ఏఐ టెక్స్ట్‌కు ఆంథ్రోపిక్‌ అదృశ్య వాటర్‌మార్క్స్

ఆంథ్రోపిక్‌ తన ఆర్టిఫిషియల్‌ ఇంటెలిజెన్స్‌ మోడళ్ల ద్వారా రూపొందించే టెక్స్ట్‌కు అదృశ్య వాటర్‌మార్క్‌లను జోడించనున్నట్లు ప్రకటించింది. కంటెంట్‌ను కాపీ చేసి మరోచోట పేస్ట్‌ చేసినా ఈ రహస్య సంకేతం కొనసాగించేలా వ్యవస్థను రూపొందించారు. కొన్ని రకాల ఎడిటింగ్‌ తర్వాత కూడా ఇది ఉండే అవకాశం ఉంది. ఆగస్టు 2, 2026 నుంచి విడుదలైన క్లాడ్‌ మోడళ్లు ఈ వాటర్‌మార్క్‌ వ్యవస్థకు మద్దతు ఇస్తాయని, ఈ ఫీచర్‌ను ప్రపంచవ్యాప్తంగా అందుబాటులోకి తీసుకొస్తున్నామని కంపెనీ తెలిపింది.

వాటర్‌మార్క్‌ వినియోగదారులకు కనిపించదని, అలాగే టెక్స్ట్‌ అర్థం, నాణ్యత లేదా చదవగలిగే విధానంపై ఎలాంటి ప్రభావం చూపదని ఆంథ్రోపిక్‌ స్పష్టం చేసింది. భవిష్యత్తులో ఈ వాటర్‌మార్క్‌లను గుర్తించేందుకు వినియోగదారులు, మూడో పక్ష సంస్థలకు టూల్స్‌ అందించాలని కంపెనీ భావిస్తోంది. అయితే, వాటర్‌మార్క్‌ ఉందని మాత్రమే కంటెంట్‌ పూర్తిగా ఏఐ ద్వారా రూపొందించబడిందని నిర్ధారించలేమని తెలిపింది. భారీగా ఎడిటింగ్‌, పేరాఫ్రేజింగ్‌, అనువాదం లేదా ఇతర రచనలతో కలపడం వల్ల వాటర్‌మార్క్‌ గుర్తించలేని స్థితికి చేరవచ్చని వివరించింది.

ఈ వ్యవస్థ క్లాడ్‌, క్లాడ్‌ ప్లాట్‌ఫామ్‌ ఏపీఐ, క్లాడ్‌ కోడ్‌, క్లాడ్‌ కోవర్క్‌, క్లాడ్‌ ట్యాగ్‌ వంటి సేవల్లోని మద్దతు ఉన్న క్లాడ్‌ మోడళ్లకు వర్తించనుంది. ఏడబ్ల్యూఎస్‌, గూగుల్‌ క్లౌడ్‌, మైక్రోసాఫ్ట్‌ ఫౌండ్రీ ద్వారా మోడళ్లను ఉపయోగించిన సందర్భాల్లోనూ ఇది వర్తిస్తుంది. ఎస్‌వీజీ, పీఎన్‌జీ, జేపీజీ వంటి ఫైళ్లకు సీ2పీఏ ప్రమాణం ఆధారంగా డిజిటల్‌గా సంతకం చేసిన ప్రొవెనెన్స్‌ మెటాడేటాను ఉపయోగించనుంది. దీనివల్ల ఫైల్‌ను క్లాడ్‌ ద్వారా ప్రాసెస్‌ చేశారా, అలాగే దాని మూల సమాచారాన్ని మార్చారా అనే విషయాలను గుర్తించవచ్చు.