భారత్ ఫుట్‌బాల్ భవిష్యత్తుపై సునీల్ ఛ‌త్రి కీలక వ్యాఖ్యలు

భారత ఫుట్‌బాల్ దిగ్గజం సునీల్ ఛ‌త్రి దేశం ఫిఫా ప్రపంచకప్‌కు అర్హత సాధించడంలో ఎదుర్కొంటున్న సవాళ్లపై తన అభిప్రాయాలను వెల్లడించారు. భారతదేశంలో ప్రతిభకు కొదవ లేదని, కానీ సరైన వయసులో ప్రతిభను గుర్తించి అభివృద్ధి చేసే వ్యవస్థ లేకపోవడమే ప్రధాన సమస్య అని ఆయన పేర్కొన్నారు. దేశవ్యాప్తంగా ఫుట్‌బాల్‌పై ఆసక్తి ఉన్న లక్షలాది మంది యువత ఉన్నప్పటికీ, వారికి సరైన మార్గదర్శకత్వం అందడం లేదని చెప్పారు.

ప్రపంచంలోని అగ్రశ్రేణి ఫుట్‌బాల్ దేశాలు చిన్న వయసు నుంచే గ్రాస్‌రూట్ స్థాయి అభివృద్ధి, కోచింగ్, అకాడమీలు, టాలెంట్ స్కౌటింగ్‌పై భారీగా పెట్టుబడులు పెడుతున్నాయని ఛ‌త్రి గుర్తుచేశారు. ఫుట్‌బాల్‌లో విజయం ఒక్కరోజులో సాధ్యంకాదని, ప్రతిభను పెంపొందించే బలమైన వ్యవస్థ అవసరమని ఆయన అభిప్రాయపడ్డారు. యువ ఆటగాళ్లకు సరైన అవకాశాలు కల్పిస్తే భారత్ కూడా ప్రపంచ ఫుట్‌బాల్ వేదికపై సత్తా చాటగలదని ఆయన విశ్వాసం వ్యక్తం చేశారు.