క్వాంటమ్ ముప్పుపై హెచ్‌కేఎంఏ అప్రమత్తం..

భవిష్యత్తులో క్వాంటమ్ కంప్యూటింగ్ వల్ల ఏర్పడే సైబర్ ముప్పులను ఎదుర్కొనేందుకు హాంకాంగ్ ద్రవ్య ప్రాధికార సంస్థ (HKMA) కీలక చర్యలు చేపట్టింది. బ్యాంకుల సైబర్ భద్రతా సామర్థ్యాన్ని అంచనా వేయడానికి క్వాంటమ్ ప్రిపేర్డ్‌నెస్ ఇండెక్స్ (QPI)తో పాటు ప్రత్యేక శ్వేతపత్రాన్ని విడుదల చేసింది. తొలి అంచనాలో హాంకాంగ్ బ్యాంకింగ్ రంగానికి 10లో కేవలం 2.3 స్కోర్ మాత్రమే లభించింది. అలాగే సర్వేలో పాల్గొన్న సంస్థల్లో దాదాపు 50 శాతం సంస్థలకు పోస్ట్-క్వాంటమ్ భద్రతా ప్రణాళికలు లేవని వెల్లడైంది. 2030 నాటికి బ్యాంకింగ్ రంగాన్ని పూర్తి స్థాయిలో క్వాంటమ్ ముప్పులను ఎదుర్కొనేలా సిద్ధం చేయడమే హెచ్‌కేఎంఏ లక్ష్యంగా ప్రకటించింది.

ఈ చర్యలు హాంకాంగ్ ఫిన్‌టెక్ 2030 వ్యూహంలో భాగంగా చేపడుతున్న సంస్కరణలకు అనుసంధానంగా ఉన్నాయి. 2023 నుంచి ఇప్పటివరకు సుమారు హెచ్‌కే$16.8 బిలియన్ విలువైన టోకనైజ్డ్ గ్రీన్ బాండ్లు జారీ చేయగా, ప్రాజెక్ట్ ఎన్‌సెంబుల్ ద్వారా టోకనైజ్డ్ డిపాజిట్లు, డిజిటల్ ఆస్తుల సెటిల్‌మెంట్ వ్యవస్థలను అభివృద్ధి చేస్తున్నారు. డిస్ట్రిబ్యూటెడ్ లెడ్జర్ టెక్నాలజీ భద్రత కోసం పోస్ట్-క్వాంటమ్ క్రిప్టోగ్రఫీ కీలకమని హెచ్‌కేఎంఏ పేర్కొంది. మరోవైపు, అంతర్జాతీయ ద్రవ్య నిధి (IMF) టోకనైజేషన్ వల్ల లావాదేవీలు వేగవంతమవుతాయని, ఖర్చులు తగ్గుతాయని పేర్కొంటూనే, ఆర్థిక స్థిరత్వం, పాలన, నియంత్రణ పరంగా కొత్త సవాళ్లు ఎదురయ్యే అవకాశం ఉందని హెచ్చరించింది.