అమెరికా అడ్డుకుంది.. యూఈఎఫ్‌ఏ ఆదుకుంది!

ప్రపంచ ఫుట్‌బాల్ వర్గాల్లో చర్చనీయాంశంగా మారిన ఘటనలో, సోమాలియాకు చెందిన ప్రముఖ ఫిఫా రిఫరీ ఒమర్ అబ్దుల్‌కదీర్ ఆర్టాన్‌కు అమెరికాలోకి ప్రవేశం నిరాకరించబడింది. ఫిఫా ప్రపంచకప్ మ్యాచ్‌ల నిర్వహణ కోసం మియామీ విమానాశ్రయానికి చేరుకున్న ఆయనను అమెరికా కస్టమ్స్ అండ్ బోర్డర్ ప్రొటెక్షన్ అధికారులు దాదాపు 11 గంటలపాటు విచారించినట్లు సమాచారం. ప్రయాణ ఉద్దేశ్యం, ప్రపంచకప్‌లోని అధికారిక బాధ్యతలు, సోమాలియాలో భద్రతా పరిస్థితులు తదితర అంశాలపై ప్రశ్నించిన అనంతరం ఆయనను ‘అడ్మిసిబుల్ కాదని’ ప్రకటించి తిరిగి పంపించారు.

ఈ నిర్ణయంపై అంతర్జాతీయ ఫుట్‌బాల్ వర్గాల నుంచి విమర్శలు వ్యక్తమయ్యాయి. ప్రపంచకప్ వంటి ప్రతిష్టాత్మక టోర్నమెంట్‌కు ఎంపికైన రిఫరీకి సరైన కారణం వెల్లడించకుండా ప్రవేశం నిరాకరించడం వివాదానికి దారితీసింది. అయితే అమెరికా అధికారులు ఇది సాధారణ భద్రతా తనిఖీల్లో భాగమేనని, అంతర్జాతీయ సందర్శకులందరికీ ఒకే విధమైన వెట్టింగ్ ప్రక్రియ అమలు చేస్తామని స్పష్టం చేశారు.

వరల్డ్‌కప్ అవకాశం కోల్పోయినా.. యూఈఎఫ్‌ఏ సూపర్ కప్ బాధ్యతలు

అమెరికాలోకి ప్రవేశం నిరాకరించబడటంతో ప్రపంచకప్ మ్యాచ్‌లకు రిఫరీగా వ్యవహరించే అవకాశం కోల్పోయిన ఒమర్ ఆర్టాన్‌కు యూరప్ ఫుట్‌బాల్ సంస్థ యూఈఎఫ్‌ఏ నుంచి ప్రతిష్టాత్మక అవకాశం లభించింది. యూఈఎఫ్‌ఏ సూపర్ కప్ మ్యాచ్‌కు రిఫరీగా ఆయనను నియమించడం ద్వారా ఆయన ప్రతిభకు అంతర్జాతీయ స్థాయిలో మరోసారి గుర్తింపు లభించింది. యూరప్‌లోని ప్రముఖ క్లబ్ టోర్నమెంట్ విజేతల మధ్య జరిగే ఈ మ్యాచ్ అత్యంత ప్రతిష్టాత్మక క్లబ్ ఫుట్‌బాల్ పోటీలలో ఒకటిగా గుర్తింపు పొందింది.

34 ఏళ్ల ఆర్టాన్ ఆఫ్రికాలో అత్యుత్తమ రిఫరీలలో ఒకరిగా పేరుగాంచారు. 2025లో కాఫ్ రిఫరీ ఆఫ్ ది ఇయర్ అవార్డును అందుకున్న ఆయన, ఆఫ్రికా కప్ ఆఫ్ నేషన్స్, కాఫ్ ఛాంపియన్స్ లీగ్ ఫైనల్ వంటి కీలక మ్యాచ్‌లకు రిఫరీగా వ్యవహరించారు. స్వదేశానికి చేరుకున్న అనంతరం అభిమానులు, అధికారులు ఘన స్వాగతం పలికారు. వచ్చే ప్రపంచకప్‌లో తప్పకుండా పాల్గొంటానని ఆయన ఆశాభావం వ్యక్తం చేశారు.