భారత జట్టులో చోటు దక్కకపోవడంపై షమీ కీలక వ్యాఖ్యలు

భారత సీనియర్ పేసర్లు భువనేశ్వర్ కుమార్, మహమ్మద్ షమీ గత కొంతకాలంగా దాదాపు ఒకే పరిస్థితిని ఎదుర్కొంటున్నారు. దేశవాళీ క్రికెట్‌లో నిలకడగా రాణిస్తూ తమ ఫిట్‌నెస్‌ను నిరూపించుకున్నప్పటికీ, ఇద్దరూ జాతీయ జట్టుకు దూరమయ్యారు. అయితే, న్యూజిలాండ్ పర్యటన కోసం బీసీసీఐ ప్రకటించిన టీ20 జట్టులో భువనేశ్వర్ కుమార్‌కు దాదాపు నాలుగేళ్ల తర్వాత చోటు దక్కగా, షమీకి అవకాశం లభించలేదు. రంజీ ట్రోఫీ 2026–27 సీజన్ ప్రారంభానికి ముందు మీడియాతో మాట్లాడిన షమీ ఎక్కడ ఆడే అవకాశం వచ్చినా అత్యుత్తమ ప్రదర్శన ఇవ్వడమే తన లక్ష్యమని స్పష్టం చేశాడు.

“భువనేశ్వర్ కుమార్‌కు భారత్ తరఫున ఆడే అవకాశం లభించింది. అది అతడికి మంచి విషయం. నా విషయానికి వస్తే, ఎక్కడ అవకాశం వచ్చినా అత్యుత్తమ ప్రదర్శన ఇస్తాను. ప్రస్తుతం నా దృష్టి పూర్తిగా ఈ రంజీ మ్యాచ్‌పైనే ఉంది. గత రెండు, మూడు సంవత్సరాలుగా నా విషయంలో ఇదే జరుగుతోంది. నేను రాణిస్తూ బెంగాల్ జట్టు తరఫున నా ఫిట్‌నెస్‌ను నిరూపించుకున్నాను. మళ్లీ భారత్ తరఫున ఆడే అవకాశం రాకపోయినా, అది నా నష్టం కాదు” అని షమీ పేర్కొన్నాడు. మరోవైపు, మహమ్మద్ షమీ, మహమ్మద్ సిరాజ్‌లకు అవకాశాలు ఎందుకు లభించడం లేదని మాజీ క్రికెటర్ వసీం జాఫర్ కూడా ఆశ్చర్యం వ్యక్తం చేశారు.