ఫిఫా వరల్డ్ కప్‌లో రొనాల్డో నిరాశాజనక ఆరంభం

అమెరికా, కెనడా, మెక్సికో సంయుక్త ఆతిథ్యంతో జరుగుతున్న ఫిఫా వరల్డ్ కప్ 2026లో పోర్చుగల్ కెప్టెన్ క్రిస్టియానో రొనాల్డో ఆశించిన స్థాయిలో రాణించలేకపోతున్నాడు. అతని సమకాలీన ఆటగాళ్లైన లియోనెల్ మెస్సీ, కిలియన్ ఎంబాపే, ఎర్లింగ్ హాలాండ్, లామినే యమాల్, హ్యారీ కేన్ తమ తొలి మ్యాచ్‌ల్లోనే గోల్స్ చేసి జట్ల విజయానికి తోడ్పడగా, రొనాల్డో మాత్రం ఇంకా ఖాతా తెరవలేదు. కాంగోతో జరిగిన తొలి మ్యాచ్‌లో 90 నిమిషాలు ఆడినా గోల్ చేయడంలోనూ, సహచరులకు అవకాశాలు కల్పించడంలోనూ విఫలమయ్యాడు.

ఈ మ్యాచ్‌లో రొనాల్డో కేవలం 25 టచ్‌లు మాత్రమే నమోదు చేయడం, మూడు షాట్ ప్రయత్నాలకు మాత్రమే పరిమితం కావడం అతని ఫామ్‌పై సందేహాలను పెంచుతోంది. 41 ఏళ్ల వయసులో అతని ప్రదర్శనలో తగ్గుదల స్పష్టంగా కనిపిస్తుండగా, మెస్సీ మాత్రం చురుకుదనాన్ని కొనసాగిస్తున్నాడు. 2006లో తొలి వరల్డ్ కప్ ఆడిన రొనాల్డో ఇప్పటివరకు ఆరు వరల్డ్ కప్‌లలో మొత్తం 8 గోల్స్ సాధించాడు. ఇటీవల నాలుగు మ్యాచ్‌ల్లో 396 నిమిషాలు ఆడినప్పటికీ పోర్చుగల్ జట్టు కేవలం ఒక్క గోల్ మాత్రమే చేయడం ఆందోళన కలిగిస్తోంది. విమర్శలు పెరుగుతున్న నేపథ్యంలో రొనాల్డో తన ఆటతోనే మళ్లీ సమాధానం చెప్పాల్సిన పరిస్థితి ఏర్పడింది.