భారత్‌-న్యూజిలాండ్‌ రెండో వన్డేపై వర్షం నీడ..

భారత్‌-న్యూజిలాండ్‌ జట్ల మధ్య రెండో వన్డే శనివారం జరగనుంది. అయితే ఈ మ్యాచ్‌కు కూడా వర్షం ముప్పు పొంచి ఉంది. వెల్లింగ్టన్‌లో ప్రస్తుతం ఎడతెరిపి లేకుండా వర్షం కురుస్తుండటంతో మ్యాచ్‌ నిర్వహణపై ఆందోళనలు వ్యక్తమవుతున్నాయి. వాతావరణ పరిస్థితుల కారణంగా టీమ్‌ఇండియా తన ప్రాక్టీస్‌ సెషన్‌ను రద్దు చేసుకోగా.. సిరీస్‌లో వెనుకబడిన న్యూజిలాండ్‌ జట్టు ఇండోర్‌ స్టేడియంలో సాధన చేసింది. తొలి వన్డేకు కూడా వర్షం అంతరాయం కలిగించింది. దీంతో డక్‌వర్త్‌ లూయిస్‌ పద్ధతిలో రెండుసార్లు లక్ష్యాన్ని సవరించారు. చివరకు భారత్‌ విజయం సాధించి ఐదు వన్డేల సిరీస్‌లో 1-0 ఆధిక్యంలో నిలిచింది.

సిరీస్‌కు డేవన్‌ కాన్వే దూరం

తొలి వన్డేకు ముందు ప్రాక్టీస్‌ సమయంలో న్యూజిలాండ్‌ బ్యాటర్‌ డేవన్‌ కాన్వే గాయపడ్డాడు. దీంతో ఆ మ్యాచ్‌కు దూరమైన అతడు.. తాజాగా సిరీస్‌ మొత్తానికి అందుబాటులో ఉండడని న్యూజిలాండ్‌ ప్రకటించింది. అతడి స్థానంలో నిక్‌ కెల్లీని కంకషన్‌ ప్రత్యామ్నాయంగా జట్టులోకి తీసుకుంది. మరోవైపు, కాన్వేతో కలిసి ఫీల్డింగ్‌ చేస్తున్న సమయంలో గాయపడిన మ్యాట్‌ హెన్రీ కోలుకున్నాడు. అతడు పూర్తి ఫిట్‌నెస్‌ సాధించి ఎంపికకు అందుబాటులో ఉన్నట్లు న్యూజిలాండ్‌ క్రికెట్‌ బోర్డు వెల్లడించింది.