ఐపిఎల్ లో ఫిక్సింగ్ అసాధ్యం - కీపర్ పార్దివ్ పటేల్

మార్చిలో ప్రారంభం కానున్న ఐపీఎల్‌ (IPL) 2026 సీజన్‌ కోసం క్రికెట్‌ అభిమానులు ఇప్పటికే ఉత్సాహంగా ఎదురుచూస్తున్నారు. అయితే, కొన్నిసార్లు అభిమానుల చర్చల్లో మ్యాచ్ ఫిక్సింగ్‌ ఆరోపణలు వినిపిస్తుంటాయి. ఈ విమర్శలను టీమ్‌ఇండియా మాజీ క్రికెటర్‌ పార్థివ్ పటేల్ ఖండించారు. ఆయన ఫిక్సింగ్‌ చేయడం అసాధ్యం అని పేర్కొన్నారు.

పార్థివ్‌ పటేల్ ఒక పాడ్‌కాస్ట్‌లో మాట్లాడుతూ, “ఐపీఎల్‌లో ఒక్క మ్యాచ్‌ కూడా ఫిక్స్‌ కాలేదు. ఏ జట్టు గెలుస్తుందో ముందే నిర్ణయించబడదు. ఫోన్లు, ఇమెయిల్‌లు, హోటల్‌లో ఎవరు వస్తారు, ఎవరు వెళ్తారు -- ఇలా అన్నీ రికార్డ్‌ అవుతాయి. చాలా కచ్చితమైన భద్రత ఉంటుంది” అని చెప్పారు.

అతను కొనసాగిస్తూ, “అందరికీ అక్రిడిటేషన్‌ అవసరం. కెప్టెన్‌కి కూడా అక్రిడిటేషన్‌ లేకుంటే మైదానం, డ్రెస్సింగ్‌ రూం‌లోకి అనుమతించరు. ఐపీఎల్ మాత్రమే కాదు, అంతర్జాతీయ క్రికెట్‌లో కూడా ఫిక్సింగ్‌ అంశంపై ప్రజలు చాలా తేలికగా ఆరోపణలు చేస్తారు. కానీ వాటిని నిరూపించడం కష్టం” అని వివరించారు. 2013 లో ఐపీఎల్‌లో జరిగిన మ్యాచ్ ఫిక్సింగ్‌ కుంభకోణం గుర్తుచేసి, చెన్నై సూపర్ కింగ్స్, రాజస్థాన్ రాయల్స్ రెండు సీజన్ల పాటు సస్పెండ్ అయ్యాయని పార్థివ్ గుర్తుచేశారు. పార్థివ్ గతంలో రాయల్ ఛాలెంజర్స్ బెంగళూరు, ముంబయి ఇండియన్స్, చెన్నై సూపర్ కింగ్స్‌ తరఫున ఆడాడు. ప్రస్తుతం గుజరాత్ టైటాన్స్‌కు అసిస్టెంట్ కోచ్‌గా వ్యవహరిస్తున్నాడు.