ప్రపంచ రెజ్లింగ్ ఛాంపియన్‌షిప్ ఫైనల్లోకి మనీషా బన్వాలా..

ప్రపంచ రెజ్లింగ్ ఛాంపియన్‌షిప్‌లో భారత రెజ్లర్ మనీషా బన్వాలా ఫైనల్లోకి దూసుకెళ్లింది. గురువారం జరిగిన మహిళల 59 కేజీల సెమీఫైనల్లో కజకిస్థాన్‌కు చెందిన అల్‌ట్యన్ షెగయెవాపై మనీషా అద్భుత విజయం సాధించింది. ఆరంభం నుంచే దూకుడుగా ఆడిన ఆమె 10-0తో ఆధిక్యంలోకి వెళ్లి, చివరకు ప్రత్యర్థిని పిన్ చేసి ఫైనల్ బెర్త్ ఖరారు చేసుకుంది. స్వర్ణ పతకం కోసం జరిగే తుది పోరులో అమెరికాకు చెందిన అబిగల్ ఎలిజబెత్‌తో తలపడనుంది. ఇప్పటికే మహిళల విభాగంలో 50 కేజీల్లో నీలమ్, 76 కేజీల్లో కాజల్ ఫైనల్ చేరినప్పటికీ రజత పతకాలతో సరిపెట్టుకున్నారు. మరోవైపు 72 కేజీల విభాగంలో తనూ శర్మ కాంస్య పతక పోటీలో నిలిచింది. రెపిచేజ్ రౌండ్‌లో ట్యునీషియాకు చెందిన జైనాబ్‌ను 5-4తో ఓడించింది. అయితే 55 కేజీల క్వార్టర్‌ఫైనల్లో అహిలా 6-9తో తుర్కియేకు చెందిన తుబా చేతిలో ఓటమి పాలైంది.

మరోవైపు పురుషుల విభాగంలో భారత రెజ్లర్ సుజీత్ కల్‌కల్‌కు నిరాశ ఎదురైంది. 65 కేజీల క్వార్టర్‌ఫైనల్లో తజకిస్థాన్‌కు చెందిన కుదీవ్ చేతిలో ఓటమి పాలయ్యాడు. ఈ పోరు 3-3తో సమంగా ముగిసినప్పటికీ, చివరి పాయింట్లు సాధించిన కారణంగా కుదీవ్‌ను విజేతగా ప్రకటించారు. ఆరంభంలో 3-1తో ఆధిక్యంలో ఉన్న సుజీత్.. చివరి 30 సెకన్లలో రెండు పాయింట్లు కోల్పోవడంతో మ్యాచ్‌ను చేజార్చుకున్నాడు. ఆసియా క్రీడల ఫైనల్లో ఇదే ప్రత్యర్థిపై చివరి క్షణాల్లో అద్భుతంగా పుంజుకుని విజయం సాధించిన సుజీత్, ఈసారి మాత్రం ఓటమిని ఎదుర్కొన్నాడు. ఈ పరాజయంతో అతడి 24 వరుస విజయాల పరంపరకు కూడా తెరపడింది.