ఫుట్ బాల్ ఆడుతుండగా పిడుగు... యువ ఆటగాడు మృతి

థాయ్‌లాండ్‌లో జరిగిన ఫుట్‌బాల్ మ్యాచ్ సమయంలో పిడుగుపడటంతో 24 ఏళ్ల యువ ఆటగాడు సాఫ్వాన్ అవే ప్రాణాలు కోల్పోయిన ఘటన తీవ్ర విషాదాన్ని మిగిల్చింది. దక్షిణ థాయ్‌లాండ్‌లో నిర్వహించిన గోలోక్ ఎఫ్ఏ కప్ టోర్నమెంట్‌లో భాగంగా మ్యాచ్ జరుగుతుండగా ఈ ప్రమాదం సంభవించింది. వర్షం కురుస్తున్నప్పటికీ ఆట కొనసాగుతుండగా ఒక్కసారిగా పిడుగుపడి మైదానంలో ఉన్న ఆటగాళ్లను షాక్‌కు గురి చేసింది.

ఈ ఘటనలో సాఫ్వాన్ అవే తీవ్రంగా గాయపడి మైదానంలోనే కుప్పకూలిపోయాడు. అతడిని రక్షించేందుకు అత్యవసర వైద్య బృందాలు ప్రయత్నించినప్పటికీ ప్రాణాలు నిలుపలేకపోయాయి. మరో 12 మంది ఆటగాళ్లు కూడా గాయపడినట్లు సమాచారం. ఈ ఘటనకు సంబంధించిన వీడియో సోషల్ మీడియాలో వైరల్ కావడంతో నిర్వాహకులపై విమర్శలు వెల్లువెత్తుతున్నాయి. థాయ్‌లాండ్ ఫుట్‌బాల్ అసోసియేషన్ సాఫ్వాన్ మరణంపై తీవ్ర సంతాపం వ్యక్తం చేసింది.