ఐపీఎల్ ట్రేడ్ సంచలనం: శాంసన్ ఢిల్లీకి, కేఎల్ రాహుల్ కేకేఆర్‌కి?

ఐపీఎల్ ట్రేడ్ గడువు దగ్గరపడుతున్న తరుణంలో భారీ మార్పులు సంభవించే సూచనలు కనిపిస్తున్నాయి. తాజా సమాచారం ప్రకారం, రాజస్థాన్ రాయల్స్ కెప్టెన్ సంజు శాంసన్ ను ఢిల్లీ క్యాపిటల్స్ జట్టు దక్షిణాఫ్రికా ఆటగాడు ట్రిస్టన్ స్టబ్‌స్ తో మార్పిడి చేసుకునే అవకాశం ఉందని తెలుస్తోంది.

ఇక మరోవైపు, కోల్‌కతా నైట్‌రైడర్స్ (KKR) జట్టు కేఎల్ రాహుల్ ను ఢిల్లీ క్యాపిటల్స్ నుండి కొనుగోలు చేయడానికి ప్రయత్నిస్తున్నది. ఈ ట్రేడ్ జరిగితే వచ్చే సీజన్ ముందు ఐపీఎల్ మొత్తం మారిపోవచ్చు.

సమాచారం ప్రకారం, ఢిల్లీ క్యాపిటల్స్ శాంసన్ కోసం స్టబ్‌స్ ట్రేడ్‌కు ఆసక్తి చూపుతున్నప్పటికీ, కేఎల్ రాహుల్‌ను వదులుకునే ఉద్దేశ్యం లేదట. రాహుల్ గత సీజన్‌లో జట్టుకు కీలక ఆటగాడిగా నిలిచారు.

గతంలో శాంసన్ ఢిల్లీ జట్టులో ఆడడమే కాకుండా, కొద్ది మ్యాచ్‌లకు కెప్టెన్‌గానూ ఉన్నాడు, అలాగే మేనేజ్‌మెంట్‌తో మంచి అనుబంధం కూడా ఉంది. అదే కారణంగా ఢిల్లీ ఇప్పుడు అతనిపై ఆసక్తి చూపుతోందని తెలుస్తోంది.

మరోవైపు, గత సీజన్‌లోనే రాజస్థాన్ రాయల్స్ మరియు శాంసన్ మధ్య విభేదాలు వెలుగులోకి వచ్చాయి. బట్లర్‌ను రిటైన్ చేయాలని శాంసన్ కోరినా, మేనేజ్‌మెంట్ నిరాకరించింది. అలాగే పలు కీలక నిర్ణయాల్లో కూడా అతనికి అవకాశం ఇవ్వలేదని సమాచారం. ఈ కారణంగా రాజస్థాన్ రాయల్స్, శాంసన్ ట్రేడ్‌లో స్టబ్‌స్‌తో పాటు ఒక అన్‌క్యాప్డ్ ప్లేయర్‌ను కూడా కోరుతున్నట్లు తెలుస్తోంది.

ఇక కేకేఆర్, కెప్టెన్సీ బాధ్యతలు చేపట్టగల ఆటగాడిని వెతుకుతూ, కేఎల్ రాహుల్‌ను సరైన ఎంపికగా చూస్తున్నప్పటికీ, ఢిల్లీ వదులుకునే సూచనలు లేవు.

ఐపీఎల్ ట్రేడ్ గడువు నవంబర్ మధ్యలో ముగుస్తుంది, మరియు వేలం డిసెంబర్ చివరి వారంలో జరగనుంది. అంటే ఇంకా కొన్ని సంచలన మార్పులు ఎదురుకావచ్చు!