Ind vs NZ: అభిషేక్ శర్మ విధ్వంసం, తొలి టి 20 లో టీమ్ ఇండియ ఘన విజయం

నాగ్‌పూర్ వేదికగా జరిగిన భారత్–న్యూజిలాండ్ తొలి టీ20 మ్యాచ్‌లో టీమిండియా 48 పరుగుల భారీ తేడాతో ఘన విజయం సాధించింది. ఈ గెలుపుతో ఐదు మ్యాచ్‌ల టీ20 సిరీస్‌లో భారత్ 1–0 ఆధిక్యంలో నిలిచింది. టీ20 వరల్డ్ కప్ 2026 సన్నాహకాలలో భాగంగా జరిగిన ఈ మ్యాచ్‌లో భారత్ బ్యాటింగ్, బౌలింగ్ రెండింట్లోనూ పూర్తి ఆధిపత్యం ప్రదర్శించింది.

టాస్ ఓడి తొలుత బ్యాటింగ్ చేసిన భారత్ 20 ఓవర్లలో 7 వికెట్ల నష్టానికి 238 పరుగుల భారీ స్కోర్ చేసింది. ఓపెనర్ అభిషేక్ శర్మ కేవలం 35 బంతుల్లో 84 పరుగులు చేసి (5 ఫోర్లు, 8 సిక్సర్లు) కివీస్ బౌలర్లపై విరుచుకుపడ్డాడు. కెప్టెన్ సూర్యకుమార్ యాదవ్ తన 100వ అంతర్జాతీయ మ్యాచ్‌లో 32 పరుగులు చేయగా, చివర్లో రింకూ సింగ్ 20 బంతుల్లో అజేయంగా 44 పరుగులు చేసి స్కోర్‌ను భారీగా పెంచాడు.

239 పరుగుల లక్ష్యంతో బరిలోకి దిగిన న్యూజిలాండ్‌కు ఆరంభం నుంచే కష్టాలు ఎదురయ్యాయి. గ్లెన్ ఫిలిప్స్ 40 బంతుల్లో 78 పరుగులతో ఒంటరి పోరాటం చేసినా ఫలితం లేకపోయింది. భారత బౌలర్లలో వరుణ్ చక్రవర్తి, శివమ్ దూబే చెరో రెండు వికెట్లు తీయగా, భారత్ న్యూజిలాండ్‌ను 20 ఓవర్లలో 7 వికెట్లకు 190 పరుగులకే పరిమితం చేసింది. ఈ మ్యాచ్‌లో అద్భుత ప్రదర్శన చేసిన అభిషేక్ శర్మకు ప్లేయర్ ఆఫ్ ది మ్యాచ్ అవార్డు దక్కింది. సిరీస్‌లో తదుపరి మ్యాచ్ జనవరి 23న రాయ్‌పూర్‌లో జరగనుంది.