బ్రెజిల్‌ తర్వాత ఉరుగ్వేతో ఢీ.. భారత్‌కు మరో కఠిన పరీక్ష

బ్రెజిల్‌తో మ్యాచ్ ముగిసిన మూడు రోజులకే భారత ఫుట్‌బాల్ జట్టుకు మరో కఠిన పరీక్ష ఎదురుకానుంది. మంగళవారం రెండు సార్లు ప్రపంచ ఛాంపియన్‌గా నిలిచిన ఉరుగ్వేతో భారత్ తలపడనుంది. సాల్ట్‌లేక్ స్టేడియంలో శనివారం బ్రెజిల్‌తో జరిగిన మ్యాచ్‌లో 0-4తో ఓడిన భారత్.. ఈసారి లోపాలను సరిదిద్దుకుని మెరుగైన ప్రదర్శన చేయాలని పట్టుదలగా ఉంది. ప్రపంచ ర్యాంకింగ్స్‌లో 138వ స్థానంలో ఉన్న భారత్‌కు 44వ ర్యాంకులో ఉన్న ఉరుగ్వేపై పోటీ ఇవ్వడం సవాలుతో కూడుకున్నదే. ఇటీవల పనామాతో 1-1 డ్రా సాధించడం భారత్‌కు కొంత ఆత్మవిశ్వాసాన్ని ఇస్తోంది.

ఆ మ్యాచ్‌లో గోల్ చేసిన ర్యాన్ విలియమ్స్‌తో పాటు మన్వీర్ సింగ్, సాహల్ అబ్దుల్ సమద్‌పై భారత జట్టు ఆశలు పెట్టుకుంది. బ్రెజిల్‌తో మ్యాచ్ ప్రారంభంలో వీరు మెరుగ్గా రాణించారు. మరోవైపు బ్రెజిల్ మ్యాచ్ తర్వాత కోలుకునేందుకు తక్కువ సమయం లభించినప్పటికీ తమకు ఎలాంటి ఇబ్బంది లేదని భారత కోచ్ ఖాలిద్ జమీల్ తెలిపారు. ఆటగాళ్లకు తక్కువ వ్యవధిలో మరో మ్యాచ్ ఆడేంత పరిణతి, అనుభవం ఉందన్నారు. ఉరుగ్వే బలమైన జట్టని, ముఖ్యంగా మ్యాచ్ ఆరంభంలో గోల్స్ ఇవ్వకుండా జాగ్రత్తపడాలని సూచించారు.