హెచ్‌సీఏ ఆధ్వర్యంలో టీజీ టీ20 లీగ్ ప్రారంభం!

హైదరాబాద్ క్రికెట్ అసోసియేషన్ ఆధ్వర్యంలో టీజీ టీ20 లీగ్‌ను అధికారికంగా ప్రారంభించారు. హైదరాబాద్‌లోని పార్క్ హయత్‌లో జరిగిన కార్యక్రమంలో లోగోను జస్టిస్ నవీన్ రావు ఆవిష్కరించారు. ఈ కార్యక్రమంలో మాజీ క్రికెటర్లు వెంకటేష్ ప్రసాద్, కృష్ణమాచారి శ్రీకాంత్, అంబటి రాయుడుతో పాటు సీపీ సి. వి. ఆనంద్ పాల్గొన్నారు. ఇండియన్ ప్రీమియర్ లీగ్ తరహాలో ఈ లీగ్ నిర్వహించనున్నారు.

జూన్, జూలై నెలల్లో జరిగే ఈ టోర్నీలో 8 జట్లు పాల్గొనగా, ఉప్పల్‌లోని రాజీవ్ గాంధీ అంతర్జాతీయ క్రికెట్ స్టేడియంలో మ్యాచ్‌లు నిర్వహిస్తారు. ఈ 8 జట్ల యాజమాన్యానికి సుమారు 40 కంపెనీలు పోటీ పడుతున్నాయి. ఈ లీగ్ ద్వారా ప్రతిభావంతులైన స్థానిక ఆటగాళ్లు వెలుగులోకి వస్తారని నిర్వాహకులు ఆశిస్తున్నారు. ఈ టోర్నీ మంచి ఆలోచన అని జస్టిస్ నవీన్‌రావు అభిప్రాయపడ్డారు. అలాగే, హెచ్‌సీఏకు 94 ఏళ్ల చరిత్ర ఉందని అంబటి రాయుడు పేర్కొంటూ, స్థానిక ఆటగాళ్లను ఐపీఎల్‌లోకి తీసుకోవాలని సన్‌రైజర్స్ హైదరాబాద్ ను కోరారు.