అర్ష్‌దీప్‌ను వదులుకోవడం బాధగా ఉంది.. కానీ ఆ డీల్‌తో అందరూ హ్యాపీ: నెస్ వాడియా

ఐపీఎల్‌ 2027కు ముందు హార్దిక్ పాండ్య, అర్ష్‌దీప్ సింగ్‌ల ట్రేడ్‌పై పంజాబ్ కింగ్స్ సహ యజమాని నెస్ వాడియా స్పందించారు. అర్ష్‌దీప్‌ను ముంబయి ఇండియన్స్‌కు పంపాలన్న నిర్ణయం తీసుకోవడం కష్టంగా అనిపించినప్పటికీ, ఈ ఒప్పందం ఇరు ఫ్రాంఛైజీలకు ప్రయోజనకరంగా ఉంటుందని ఆయన తెలిపారు. ఈ డీల్‌తో ముంబయి ఇండియన్స్, పంజాబ్ కింగ్స్‌తో పాటు తమ కెప్టెన్ శ్రేయస్ అయ్యర్ కూడా సంతోషంగా ఉన్నారని పేర్కొన్నారు. బీసీసీఐ ఆమోదం లభించడానికి ముందు రెండు జట్ల మధ్య దాదాపు నెల రోజుల పాటు చర్చలు జరిగాయని వెల్లడించారు. ఇది ఇరు ఫ్రాంఛైజీలు పరస్పర అంగీకారంతో తీసుకున్న నిర్ణయమని స్పష్టం చేశారు.

అర్ష్‌దీప్ సింగ్ అద్భుతమైన బౌలర్ అని నెస్ వాడియా ప్రశంసించారు. ముంబయి ఇండియన్స్ తరఫున కూడా అతడు రాణిస్తాడనే నమ్మకం ఉందన్నారు. సుదీర్ఘకాలం పంజాబ్ కింగ్స్‌తో అనుబంధం కలిగిన అర్ష్‌దీప్‌ను వీడటం భావోద్వేగంగా అనిపించిందని చెప్పారు. అయితే, ఒక ఆటగాడు తన కెరీర్‌లో మరింత ఉన్నత స్థాయికి వెళ్లే అవకాశం వచ్చినప్పుడు సంతోషించాల్సిందేనని అభిప్రాయపడ్డారు. ఈ ఒప్పందంలో భాగంగా హార్దిక్ పాండ్య ముంబయి ఇండియన్స్ నుంచి పంజాబ్ కింగ్స్‌కు వెళ్లగా, అర్ష్‌దీప్ సింగ్ ముంబయి జట్టులో చేరాడు.