బిగ్ బాస్ తెలుగు సీజన్ 10 డే 63: ఇంట్లో దీపావళి స్పెషల్.. ఈ వారం నో ఎలిమినేషన్

బిగ్ బాస్ తెలుగు 10లో తొమ్మిదో వారం ముగిసింది. దీపావళి సందర్భంగా ప్రసారమైన ఆదివారం ఎపిసోడ్‌లో నాగార్జున హౌస్‌మేట్స్‌కు ఊరటనిచ్చే ప్రకటన చేశారు. ఈ వారం ఎలిమినేషన్ ఉండదని వెల్లడించారు. దీంతో నామినేషన్లలో ఉన్న సుధీర్, నీతూ సహా ఇతర సభ్యులు ఊపిరి పీల్చుకున్నారు. ఇక పదో వారం ఫ్యామిలీ వీక్‌గా సాగనుందని నాగార్జున ప్రకటించారు.

ఎపిసోడ్ ప్రారంభంలోనే ముకేష్, దేబ్జానీ మధ్య జరిగిన వివాదంపై నాగార్జున చర్చించారు. శివ్ తన చుట్టూ తిరుగుతున్నాడని దేబ్జానీ చేసిన వ్యాఖ్య తనకు నచ్చలేదని ఆమె వివరించింది. మరోవైపు, దేబ్జానీ ముకేష్‌ను ఉద్దేశించి రంగు ఆధారంగా చేసిన వ్యాఖ్య తప్పని ముకేష్ పేర్కొన్నాడు. దీనికి సంబంధించిన వీడియోను నాగార్జున చూపించారు. దేబ్జానీ ఉద్దేశపూర్వకంగా అనకపోయినా, ఆ వ్యాఖ్య తప్పేనని.. అలాగే ముకేష్ కూడా అలా మాట్లాడటం సరికాదని చెప్పారు. ఇద్దరూ ఒకరికొకరు క్షమాపణ చెప్పుకోవాలని సూచించారు.

తర్వాత జరిగిన ‘నో పాజ్ ఓన్లీ ఆన్సర్’ టాస్క్‌లో ముకేష్ టీమ్ విజయం సాధించింది. ఈ క్రమంలో ముకేష్ సేఫ్ అయినట్లు నాగార్జున ప్రకటించారు. అనంతరం నరేష్, రామ్ ప్రసాద్ కూడా సురక్షితంగా ఉన్నారని వెల్లడించారు. ‘బీబీ సినిమా’ టాస్క్‌లో హౌస్‌మేట్స్ ఒకరిపై మరొకరు ఆసక్తికరమైన కామెంట్లు చేశారు. దేబ్జానీ, త్రిగుణ్, ఆర్కే, నీతూ, వర్షిణి తదితరుల గురించి తమ అభిప్రాయాలను సినిమా టైటిళ్ల తరహాలో వ్యక్తం చేశారు. ఈ టాస్క్ తర్వాత వర్షిణి కూడా సేఫ్ అయింది.

ఇక నీతూ, ఆర్కే మధ్య వాగ్వాదం చోటుచేసుకుంది. నామినేషన్లలో తన ఫొటోనే కనిపిస్తోందంటూ నీతూ ఆర్కేపై అసహనం వ్యక్తం చేసింది. మరోవైపు, ‘ఇట్లు అర్జున’ సినిమా ప్రమోషన్లలో భాగంగా నటీనటులు అనీష్, అనస్వర బిగ్ బాస్ హౌస్‌లోకి వచ్చారు. ఈ సందర్భంగా ఫ్యామిలీ వీక్‌లో పాల్గొనే అవకాశం లభించని వర్షిణి, నరేష్, ఆర్కేలలో ఒకరికి కుటుంబ సభ్యులను కలిసే అవకాశం కల్పించేందుకు ప్రత్యేక టాస్క్ నిర్వహించారు.

ఈ టాస్క్‌లో హౌస్‌మేట్స్ తమ దగ్గరున్న వస్తువులను వెయింగ్ మిషన్‌లో వేయాల్సి వచ్చింది. ఒకసారి వేసిన వస్తువులను తిరిగి తీసుకునే అవకాశం లేదని నాగార్జున స్పష్టం చేశారు. నరేష్ కోసం ఇంటి సభ్యులు ఎక్కువగా వస్తువులను త్యాగం చేయడంతో ఆయనకు ఫ్యామిలీ వీక్ అవకాశం దక్కింది. వర్షిణి కోసం ముకేష్ ఎక్కువ వస్తువులు ఇచ్చినా, తన కోసం మరింత త్యాగం చేయలేదని ఆమె అతడిపై అలిగింది. తన దగ్గర ఉన్న వస్తువులన్నీ ఇచ్చానని ముకేష్ వివరణ ఇచ్చాడు. ఝాన్సీ ఇచ్చిన షూ గురించి ముకేష్ ప్రస్తావించడంతో వర్షిణి అసహనం మరింత పెరిగింది.

చివరగా ఎలిమినేషన్ ప్రక్రియలో శివ్, నీతూ, సుధీర్ వరుసగా సేఫ్ అయినట్లు నాగార్జున ప్రకటించారు. దీపావళి ప్రత్యేక ఎపిసోడ్ కావడంతో ఈ వారం ఎలిమినేషన్ లేదని స్పష్టం చేశారు. అయితే, ఇకపై ఆటపై మరింత శ్రద్ధ పెట్టాలని హౌస్‌మేట్స్‌కు హెచ్చరిక జారీ చేశారు. దీంతో తొమ్మిదో వారం ఎలాంటి ఎలిమినేషన్ లేకుండానే ముగియగా, పదో వారం ‘ఫ్యామిలీ టైమ్’ థీమ్‌తో సాగనుంది.