ఈజిప్టులో ఘోర రైలు ప్రమాదం

ఈజిప్టులోని గిజా ప్రావిన్స్‌లో రెండు ప్యాసింజర్ రైళ్లు ఢీకొన్న ఘోర ప్రమాదం చోటుచేసుకుంది. అల్‌ అయ్యత్‌ జిల్లా నుంచి ఫయూమ్‌ వెళ్తున్న ఓ రైలు.. కైరో నుంచి అస్వాన్‌ వెళ్తున్న మరో రైలును వెనుక వైపు నుంచి ఢీకొట్టింది. ఈ ఘటనలో నలుగురు ప్రాణాలు కోల్పోగా, 90 మందికిపైగా గాయపడ్డారు. ప్రమాద తీవ్రతకు పలు రైలు బోగీలు పట్టాలు తప్పాయి. సమాచారం అందుకున్న అత్యవసర సహాయక బృందాలు వెంటనే ఘటనాస్థలికి చేరుకుని సహాయక చర్యలు చేపట్టాయి.

ప్రమాదంలో గాయపడిన వారిని సమీపంలోని ఆసుపత్రులకు తరలించి చికిత్స అందిస్తున్నట్లు ఈజిప్టు ఆరోగ్యశాఖ వెల్లడించింది. ఘటనపై సమగ్ర దర్యాప్తు జరిపి, ప్రమాదానికి గల కారణాలను త్వరగా గుర్తించాలని ఆ దేశ అధ్యక్షుడు అబ్దెల్ ఫతాహ్ ఆదేశించారు. ఇదే గిజా ప్రావిన్స్‌లో గతేడాది రెండు గూడ్స్ రైళ్లు ఢీకొన్న ప్రమాదం కూడా చోటుచేసుకుంది. ఆ ఘటనలో లోకోపైలట్‌తో పాటు ఆయన సహాయకుడు గాయపడ్డారు.