బిగ్‌బాస్ హౌస్‌లో మాటల మంటలు.. వర్షిణి, ముకేశ్‌లకు ఎదురైన విమర్శలు!

బిగ్‌బాస్ తెలుగు సీజన్ 10లో తొమ్మిదో వారం నామినేషన్ల ప్రక్రియ హౌస్‌లో తీవ్ర వాగ్వాదాలకు దారితీసింది. ఈసారి ముకేశ్ గౌడ్, వర్షిణి ప్రధానంగా నామినేషన్లలో టార్గెట్ అయ్యారు. పాత గొడవలను ప్రస్తావిస్తూ ఇంటి సభ్యులు ఒకరిపై మరొకరు ఆరోపణలు చేసుకున్నారు. వర్షిణి.. నరేష్‌ను నామినేట్ చేస్తూ హోటల్ టాస్క్ సమయంలో ఝాన్సీ డబ్బులు అడిగినా ఇవ్వలేదని ప్రశ్నించింది. దేబ్జానీ చెప్పిన కారణంగానే నరేష్ డబ్బులు ఇవ్వలేదని ఆరోపించింది. దీనిపై నరేష్ తీవ్రంగా స్పందించాడు. డబ్బులు తనవని, వాటిని ఎలా ఖర్చు చేసుకోవాలనేది తన వ్యక్తిగత నిర్ణయమని గతంలోనే స్పష్టం చేశానని బదులిచ్చాడు. మరోవైపు రామ్ ప్రసాద్ కూడా వర్షిణిని నామినేట్ చేస్తూ, బయట స్నేహంగా ఉంటూ లోపల మరోలా వ్యవహరిస్తోందని విమర్శించాడు. నరేష్‌ను తన అవసరాల కోసం ఉపయోగించుకుంటోందన్న ఆరోపణను రామ్ ప్రసాద్ తప్పుబట్టాడు.

ఇక ముకేశ్ గౌడ్ గతంలో చేసిన వ్యాఖ్యలు నామినేషన్ల సందర్భంగా మరోసారి వివాదానికి దారితీశాయి. దేబ్జానీ వెనుక శివ తిరుగుతున్నాడనే అర్థం వచ్చేలా ముకేశ్ మాట్లాడటంపై శివ తీవ్ర ఆగ్రహం వ్యక్తం చేశాడు. మహిళ గురించి అలాంటి వ్యాఖ్యలు చేయడం సరికాదని నిలదీశాడు. కేవలం మూడు స్టార్ల కోసం ఇంతలా దిగజారాలా అంటూ ప్రశ్నించాడు. త్రిగుణ్ కూడా ముకేశ్ తీరుపై అసహనం వ్యక్తం చేశాడు. ఝాన్సీ ఎలిమినేషన్‌కు కూడా ముకేశ్ కారణమని ఆరోపించాడు. మరోవైపు దేబ్జానీ సైతం ముకేశ్ ప్రవర్తనను తప్పుబట్టింది. ఆటలో వేగం, సమతుల్యత కంటే వ్యక్తిత్వం, ప్రవర్తనే ముఖ్యమని పేర్కొంటూ అతడిని నామినేట్ చేసింది. తన వ్యాఖ్యలతో బాధపడ్డానని వెల్లడించింది. దీంతో తొమ్మిదో వారం నామినేషన్ల ఎపిసోడ్‌లో హౌస్ సభ్యుల మధ్య వాగ్వాదాలు తారస్థాయికి చేరాయి.