జూబ్లీహిల్స్ ఉపఎన్నిక ప్రతిష్టా పోరు – ఎవరి చేతిలో విజయం?

తెలంగాణ రాజధాని హృదయంలోని జూబ్లీహిల్స్ ఉపఎన్నిక రాజకీయ పార్టీలకు ప్రతిష్టాత్మక పోరుగా మారింది. అధికార కాంగ్రెస్ పార్టీ సీటును గెలిచి తన బలం నిరూపించుకోవాలని చూస్తుంటే, బీఆర్‌ఎస్‌ పార్టీ కోల్పోయిన గౌరవాన్ని తిరిగి పొందేందుకు కసిగా రంగంలోకి దిగింది. సీఎం రేవంత్‌రెడ్డి, బీఆర్‌ఎస్ వర్కింగ్ ప్రెసిడెంట్ కేటీఆర్‌ స్వయంగా ప్రచార బాట పట్టడంతో ఇది ఇద్దరికీ ప్రతిష్టాత్మక యుద్ధంగా మారింది. ఇక బీజేపీ మాత్రం నగర ఓటర్లను ఆకర్షించి కాంగ్రెస్‌, బీఆర్‌ఎస్‌ రెండింటి సమీకరణాన్ని చెరిపేయాలని ప్రయత్నిస్తోంది. మృతిచెందిన బీఆర్‌ఎస్‌ ఎమ్మెల్యే మాగంటి గోఫినాథ్ స్థానంలో ఆయన భార్య మాగంటి సునీతను బీఆర్‌ఎస్‌ బరిలో నిలబెడుతుండగా, బీజేపీ లంకల దీపక్‌రెడ్డిని, కాంగ్రెస్‌ నవీన్‌ యాదవ్‌ను రంగంలోకి దించింది.

ఈ ఉపఎన్నిక ఒకే నియోజకవర్గ పోరాటం కాదు — ఇది హైదరాబాద్ ప్రజాభిప్రాయానికి ప్రతిబింబంగా మారింది. రాబోయే జీహెచ్‌ఎంసీ ఎన్నికల దృష్ట్యా కాంగ్రెస్‌ తన బలం విస్తరించుకోవడానికి ఇది కీలకంగా ఉంది. మరోవైపు లోక్‌సభ ఎన్నికల ఓటమి తర్వాత బీఆర్‌ఎస్‌కి ఇది తిరిగి పునరుజ్జీవన పోరాటం. బీఆర్‌ఎస్ సీనియర్ నేత హరీష్ రావు ఈ ఎన్నికను “ప్రజా తీర్పు”గా పేర్కొనగా, బీజేపీ కిషన్ రెడ్డి, బండి సంజయ్ వంటి నేతలతో దూకుడుగా ప్రచారం సాగిస్తోంది. జూబ్లీహిల్స్‌లో విలాసవంతమైన ప్రాంతాలతో పాటు బలహీన వర్గ కాలనీలు కూడా ఉండటంతో, పౌరసదుపాయాల అభివృద్ధి ప్రధాన అంశంగా మారింది. ఈ ఉపఎన్నిక తెలంగాణ రాజకీయాల్లో గౌరవ పోరుగా నిలిచింది.