రాష్ట్రవ్యాప్తంగా మూడో, తుది దశ పంచాయతీ ఎన్నికల ప్రక్రియ ప్రారంభం

తెలంగాణ రాష్ట్రవ్యాప్తంగా ఆసక్తిని రేకెత్తిస్తున్న సర్పంచ్ ఎన్నికల మూడో, చివరి దశ ఈ రోజు ముగియనుంది. ఈ నేపథ్యంలో ఉదయం 7 గంటలకు రాష్ట్రంలోని అన్ని పోలింగ్ కేంద్రాల్లో ఓటింగ్ ప్రక్రియ ప్రారంభమైంది. మధ్యాహ్నం 1 గంట వరకు పోలింగ్ కొనసాగనుండటంతో, ఓటర్లు ఉదయమే పెద్ద సంఖ్యలో పోలింగ్ బూత్‌లకు చేరుకుని తమ ఓటు హక్కును వినియోగించుకుంటున్నారు.

ఈ తుది విడతలో రాష్ట్రంలోని 182 మండలాల్లో ఉన్న 3,752 గ్రామాల్లో ఎన్నికల పోలింగ్ జరుగుతోంది. మొత్తం 12,652 మంది అభ్యర్థులు ఈ ఎన్నికల బరిలో నిలిచారు. ఈ రోజు రాష్ట్రవ్యాప్తంగా 53,06,401 మంది ఓటర్లు తమ ఓటు హక్కును వినియోగించుకోనున్నారు.

మధ్యాహ్నం 1 గంటకు పోలింగ్ ముగియగానే, రెండు గంటల నుంచి ఓట్ల లెక్కింపు ప్రారంభం కానుంది. తొలి రెండు విడతల్లో చోటు చేసుకున్న ఘటనలను దృష్టిలో పెట్టుకుని, సమస్యాత్మక ప్రాంతాల్లో ఎన్నికల అధికారులు మరియు పోలీసు బలగాలు భారీ భద్రతా ఏర్పాట్లు చేపట్టాయి.