మహారాష్ట్రతో కాదు.. చైనా, జపాన్, దక్షిణ కొరియాతోనే తెలంగాణ పోటీ: సీఎం రేవంత్ రెడ్డి

రేవంత్ రెడ్డి తెలంగాణను ప్రపంచ స్థాయి ఆర్థిక శక్తిగా తీర్చిదిద్దాలనే లక్ష్యంతో ముందుకు సాగుతున్నామని స్పష్టం చేశారు. బెంగళూరులో జరిగిన ది హిందూ హడిల్ 2026 కార్యక్రమంలో మాట్లాడుతూ, తెలంగాణకు ఇతర భారత రాష్ట్రాలు పోటీ కాదని, తమ అసలు పోటీ చైనా, జపాన్, దక్షిణ కొరియా వంటి ప్రపంచ ఆర్థిక శక్తులతోనేనని పేర్కొన్నారు. “చైనా ప్లస్ వన్ అంటే తెలంగాణ” అనే నినాదంతో ప్రపంచ కంపెనీలను రాష్ట్రానికి ఆకర్షించడమే తమ లక్ష్యమని తెలిపారు.

ఫార్మా, ఎలక్ట్రిక్ వాహనాలు, రక్షణ తయారీ, ఏరోస్పేస్, అధునాతన సాంకేతిక రంగాల్లో తెలంగాణను అగ్రగామిగా నిలపడానికి ప్రభుత్వం కృషి చేస్తోందని సీఎం చెప్పారు. ప్రపంచ స్థాయి పెట్టుబడులను ఆకర్షించి, బలమైన పారిశ్రామిక వాతావరణాన్ని సృష్టించేందుకు చర్యలు తీసుకుంటున్నామని వెల్లడించారు. రేవంత్ రెడ్డి వ్యాఖ్యలు సోషల్ మీడియాలో విస్తృత చర్చకు దారితీశాయి. కొందరు ఆయన దూరదృష్టిని ప్రశంసిస్తుండగా, మరికొందరు చైనా వంటి తయారీ దిగ్గజాలతో పోటీ సాధ్యసాధ్యాలపై ప్రశ్నలు లేవనెత్తుతున్నారు.