జైల్లో అంబటి రాంబాబుకు ప్రత్యేక వైద్య సదుపాయాలు

 ముఖ్యమంత్రి చంద్రబాబు నాయుడుపై దూషణలకు సంబంధించిన కేసులో రాజమహేంద్రవరం కేంద్ర కారాగారంలో రిమాండ్ ఖైదీగా ఉన్న మాజీ మంత్రి అంబటి రాంబాబు స్లీప్ అప్నియా పరికరం సహాయంతో విశ్రాంతి తీసుకుంటున్నారని జైలు అధికారులు తెలిపారు.శ్వాస సంబంధిత సమస్యలు ఉన్నవారు సాధారణంగా ఈ పరికరాన్ని ఉపయోగిస్తారని వైద్యులు పేర్కొంటున్నారు. నిద్రలో ఉన్న సమయంలో ఒక్కసారిగా శ్వాస తీసుకునే స్థాయి తగ్గిపోవడం, ఆ తర్వాత మళ్లీ సాధారణ స్థితికి రావడం వంటి లక్షణాలు ఈ వ్యాధిలో కనిపిస్తాయని చెప్పారు.

ఇలాంటి పరిస్థితుల్లో శరీరంలో ఆక్సిజన్ స్థాయి ప్రమాదకరంగా తగ్గకుండా ఉండేందుకు స్లీప్ అప్నియా పరికరం సహాయపడుతుందని వైద్యులు వివరించారు. ఈ సమస్య ఎప్పుడు తలెత్తుతుందో ముందుగా చెప్పలేని కారణంగా, నిద్రపోయే ముందు ఈ పరికరాన్ని అమర్చుకుంటారని తెలిపారు. కోర్టు ఆదేశాల మేరకు అంబటి రాంబాబుకు అవసరమైన వైద్య సదుపాయాలు కల్పిస్తూ, ఈ పరికరాన్ని సమకూర్చినట్లు జైలు అధికారులు వెల్లడించారు.