పెమ్మ‌సానికి పవర్ ఛాలెంజ్.. పెద్ద హోంవర్క్!

గుంటూరు ఎంపీగా, కేంద్ర మంత్రిగా ఉన్న పెమ్మ‌సాని చంద్రశేఖర్‌కు సీఎం చంద్రబాబు కీలక బాధ్యతలు అప్పగించారు. రాష్ట్ర భవిష్యత్తుకు అత్యంత ప్రాధాన్యత ఉన్న రెండు కీలక అంశాల్లో కేంద్రాన్ని ఒప్పించి అనుకూల నిర్ణయాలు సాధించాల్సిన బాధ్యతను ఆయనకు అప్పగించినట్లు చంద్రబాబు స్వయంగా పార్టీ ముఖ్య నేతలకు వెల్లడించారు.

అమరావతి రాజధానికి చట్టబద్ధత కల్పించడం, అలాగే కేంద్రం నుంచి అవసరమైన నిధులు సమీకరించడం — ఈ రెండు అంశాలు ఇప్పుడు పెమ్మ‌సాని భుజాలపై ఉన్న ప్రధాన టాస్క్‌లుగా మారాయి. కేంద్ర మంత్రిగా ఉండటంతో పాటు రాష్ట్రానికి కావాల్సిన నిధులను కూడా ఆయనే తీసుకురావాలని చంద్రబాబు స్పష్టం చేశారు. ఈ విషయాన్ని పెమ్మ‌సాని చంద్రశేఖర్ కూడా తాజాగా మీడియా ముందు ధృవీకరించారు. అభివృద్ధి పనులు వేగంగా ముందుకు సాగాలంటే కేంద్ర సహకారం తప్పనిసరిగా అవసరమని, అందుకే చంద్రబాబు తనకు ‘భారీ హోంవర్క్’ అప్పగించారని ఆయన వ్యాఖ్యానించారు.

ఇక అమరావతి రాజధాని అంశం రాజకీయంగా మరోసారి హాట్ టాపిక్‌గా మారుతోంది. 2019–24 ఎన్నికల్లో ప్రధాన చర్చాంశంగా నిలిచిన ఈ విషయం, రాబోయే 2029 ఎన్నికల్లోనూ కీలక పాత్ర పోషించనుంది. ఈ నేపథ్యంలో అమరావతికి చట్టబద్ధత కల్పించాలన్న రైతుల డిమాండ్‌ను నెరవేర్చేందుకు రాష్ట్ర ప్రభుత్వం సీరియస్‌గా అడుగులు వేస్తోంది. ఇటీవల ఎదురైన కొన్ని అడ్డంకులను అధిగమించి, అమరావతికి చట్టబద్ధత కల్పించే బిల్లును పార్లమెంట్లో ప్రవేశపెట్టేలా కేంద్రాన్ని ఒప్పించే బాధ్యతను సీఎం చంద్రబాబు పెమ్మ‌సాని చంద్రశేఖర్‌కు అప్పగించారు.