సైక్లోన్ మొంథా పై 24 గంటలూ పర్యవేక్షణలో సీఎం చంద్రబాబు – తుఫాను నియంత్రణలో టీమ్ సజావుగా పని

సైక్లోన్ మొంథా ప్రభావంపై ఆంధ్రప్రదేశ్ ముఖ్యమంత్రి చంద్రబాబు నాయుడు ఆర్‌టీజీఎస్‌ సెంటర్‌ నుంచి నిరంతర పర్యవేక్షణ చేస్తున్నారు. మంత్రి నారా లోకేశ్‌, అనిత మరియు ఆర్‌టీజీఎస్‌ అధికారులు ఈ సమీక్ష సమావేశంలో పాల్గొన్నారు.

తుఫాను ప్రభావిత ప్రాంతాల్లో చిక్కుకున్న ప్రజలకు ఆహారం, తాగునీరు నిరంతరంగా అందించడమే కాకుండా, కిసాన్ డ్రోన్ల సాయంతో మందులు పంపాలని సీఎం అధికారులను ఆదేశించారు. ప్రతి వాహనం, రక్షణ యంత్రం ఆర్‌టీజీఎస్‌ సెంటర్‌ నుండి లైవ్ ట్రాకింగ్‌లో ఉంది. అధికారులు రాత్రింబవళ్లు శ్రమిస్తూ తుఫాను ప్రభావాన్ని తగ్గించే ప్రయత్నం చేస్తున్నారు. నెల్లూరు జిల్లాలో ఇప్పటివరకు అత్యధిక వర్షపాతం నమోదైంది. విశాఖపట్నం, శ్రీకాకుళం, అనకాపల్లి జిల్లాల్లో కూడా భారీ వర్షాలు కురిశాయి. ప్రస్తుతం మొంథా తుఫాను కాకినాడ తీరానికి సుమారు 150 కిలోమీటర్ల దూరంలో కేంద్రీకృతమై ఉంది. రాత్రి 11:30 ప్రాంతంలో భూభాగాన్ని తాకే అవకాశం ఉందని అధికారులు తెలిపారు.

రాత్రి 9 గంటల నుంచి తెల్లవారుజామున వరకూ తీవ్ర వర్షాలు కురిసే అవకాశం ఉండటంతో తీరప్రాంతాల్లో ప్రభుత్వం ప్రయాణ ఆంక్షలు విధించింది. గ్రామ, వార్డు సచివాలయాల్లో నిరంతర సేవలు కొనసాగించేందుకు 3,000 జనరేటర్లు ఏర్పాటు చేశారు.