చైనా–జపాన్ స్థాయిలో అభివృద్ధి… తెలంగాణ కొత్త టార్గెట్ ఇదే!

భారత్‌లో ఎన్నో పెద్ద నగరాలు ఉన్నప్పటికీ, తెలంగాణ తన అభివృద్ధిని న్యూయార్క్, టోక్యో వంటి ప్రపంచ స్థాయి నగరాలతో పోల్చుకుంటోంది. ఈ స్థాయి ఎదుగుదల ఎలా సాధ్యమైందన్న ప్రశ్నకు ఒక స్పష్టమైన సమాధానం ఉంది—గత కొన్ని దశాబ్దాల్లో అమెరికా, యూరప్, ఆసియా దేశాల్లో పనిచేసే ప్రతిభావంతులైన యువత ఎక్కువగా భారతీయులే, ముఖ్యంగా మన రాష్ట్రం నుంచి వెళ్లిన వారే. ఇప్పుడు వారు తిరిగి భారత్‌లో అవకాశాలను వెతుకుతున్నారు. ఆ టాలెంట్‌ను ఆకర్షించడం, అంతర్జాతీయ కంపెనీలకు రాష్ట్రంలోని బలం, అవకాశాలు చూపించడం—ఇవే తెలంగాణను ప్రత్యేక స్థానంలో నిలిపాయి. ఈ దృక్కోణంతోనే ప్రభుత్వం గ్లోబల్ సమ్మిట్ నిర్వహించడానికి, 'విజన్-2035' మరియు 'తెలంగాణ రైజింగ్–2047' వంటి పథకాలను సిద్ధం చేసేందుకు ముందడుగు వేసింది. రిజర్వ్ బ్యాంక్ మాజీ గవర్నర్ రంగరాజన్ కూడా 2047 నాటికి దేశంలో అత్యంత అభివృద్ధి చెందిన నాలుగు రాష్ట్రాల్లో తెలంగాణ ఒకటిగా ఎదుగుతుందని వ్యాఖ్యానించారు.

ఈ దిశగా తెలంగాణ ప్రభుత్వం ముందుగా వన్ ట్రిలియన్ డాలర్ల ఎకానమీని లక్ష్యంగా పెట్టుకుంది. దీని తర్వాత 2047 నాటికి రాష్ట్రాన్ని త్రీ ట్రిలియన్ డాలర్ల ఆర్థిక వ్యవస్థగా మార్చడమే తుదిలక్ష్యం. అంటే అప్పటి వరకు తెలంగాణ ఆర్థిక విలువ 270 లక్షల కోట్ల రూపాయలకు చేరాలి. ఈ భారీ లక్ష్యాన్ని సాధించేందుకు అవసరమైన అడుగులు, పెట్టుబడులు, పాలసీల యొక్క పూర్తి రూట్ మ్యాప్‌ను రూపొందిస్తూ ‘తెలంగాణ రైజింగ్–2047’ విజన్ డాక్యుమెంట్ సిద్ధమవుతోంది. ఈ డాక్యుమెంట్‌ను డిసెంబర్ 8, 9 తేదీల్లో ఫోర్త్ సిటీలో జరగనున్న గ్లోబల్ సమ్మిట్‌లో విడుదల చేయనున్నారు. చైనా, జపాన్ స్థాయిలో అభివృద్ధిని సాధించడం తెలంగాణ యొక్క ప్రధాన దీర్ఘకాల లక్ష్యంగా ప్రభుత్వం స్పష్టంగా పేర్కొంటోంది.