పవన్ వ్యాఖ్యలకు కేటీఆర్ ఘాటు కౌంటర్

బీఆర్ఎస్ వర్కింగ్ ప్రెసిడెంట్ కేటీఆర్, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ చేసిన వ్యాఖ్యలపై తీవ్రంగా స్పందించారు. తెలంగాణ ఈ నేల కోసం పోరాడిన, త్యాగాలు చేసిన ప్రజల సొత్తని స్పష్టం చేసిన ఆయన, రాష్ట్ర ఆవిర్భావం వెనుక దశాబ్దాల ఉద్యమం, వేలాది మంది త్యాగాలు ఉన్నాయని గుర్తు చేశారు. తెలంగాణ ఏర్పాటును సాధారణ రాజకీయ పరిణామంగా కాకుండా ప్రజల ఆకాంక్షల ఫలితంగా చూడాలని పేర్కొన్నారు.

ప్రాంతీయవాదంపై పవన్ కళ్యాణ్ చేసిన వ్యాఖ్యలను ప్రస్తావిస్తూ, ప్రాంతీయ ఆకాంక్షలు ప్రజాస్వామ్య వ్యవస్థలో సహజమని కేటీఆర్ అభిప్రాయపడ్డారు. దేశంలో ఏ రాజకీయ పార్టీ అయినా, ఏ నాయకుడైనా ఎక్కడైనా ఎన్నికల్లో పోటీ చేయవచ్చని అంగీకరించిన ఆయన, అయితే ఆయా ప్రాంతాల చరిత్ర, పోరాటాలు, ప్రజల భావోద్వేగాలు, త్యాగాలను గౌరవించడం అవసరమని చెప్పారు. తెలంగాణ ఆత్మగౌరవాన్ని కాపాడటంలో తమ వైఖరి స్పష్టంగా కొనసాగుతుందని కేటీఆర్ పేర్కొన్నారు.