తమిళనాడు ఎన్నికల్లో కీలక నిర్ణయం… పోటీకి దూరమైన కమల్ హాసన్ పార్టీ

తమిళనాడు అసెంబ్లీ ఎన్నికల వేళ నటుడు, మక్కల్ నీది మయ్యం (MNM) అధ్యక్షుడు, రాజ్యసభ సభ్యుడు కమల్ హాసన్ కీలక ప్రకటన చేశారు. ఈ ఎన్నికల్లో తమ పార్టీ నేరుగా పోటీ చేయబోమని ఆయన స్పష్టం చేశారు. అలాగే డీఎంకే నేతృత్వంలోని కూటమికి మద్దతు ఇవ్వాలని నిర్ణయించినట్లు వెల్లడించారు. సీట్ల పంపకాలపై డీఎంకే మరియు దాని మిత్రపక్షాల మధ్య ఒప్పందం ఖరారవుతున్న సమయంలో ఈ నిర్ణయం వెలువడింది.

కూటమిలో తమకు కేటాయించిన సీట్ల సంఖ్యతో పాటు, డీఎంకే ‘రైజింగ్ సన్’ గుర్తుపై పోటీ చేయాలన్న ప్రతిపాదన తమకు ఆమోదయోగ్యం కాదని కమల్ హాసన్ తెలిపారు. ఈ కారణంగానే అసెంబ్లీ ఎన్నికల బరిలో నుంచి వైదొలగాలని నిర్ణయించుకున్నట్లు ఆయన పేర్కొన్నారు. ఈ మేరకు ఆయన ఒక సుదీర్ఘ లేఖ విడుదల చేసి, పార్టీ కార్యకర్తలకు కృతజ్ఞతలు తెలిపారు.