

ఆంధ్రప్రదేశ్లో జరిగిన ఎంపీపీ ఎన్నికలు పలు ఆసక్తికర పరిణామాలకు వేదికయ్యాయి. పలుచోట్ల సిట్టింగ్, మాజీ ప్రజాప్రతినిధుల కుటుంబసభ్యులు మండల పరిషత్ పీఠాలను దక్కించుకున్నారు. రంపచోడవరం ఎమ్మెల్యే మిరియాల శిరీషాదేవి తల్లి కృష్ణవేణి రాజవొమ్మంగి ఎంపీపీగా ఎన్నికవగా.. ఆమె భర్త విజయభాస్కర్ అదే మండలంలో జడ్పీటీసీ సభ్యుడిగా గెలిచారు. బాపట్ల జిల్లా నిజాంపట్నం ఎంపీపీగా మాజీ మంత్రి, మాజీ ఎంపీ మోపిదేవి వెంకటరమణ కుమారుడు మోపిదేవి రాజీవ్ ఎన్నికయ్యారు. గంగాధర నెల్లూరు ఎమ్మెల్యే థామస్ సోదరుడు నిధి కార్వేటినగరం ఎంపీపీగా బాధ్యతలు చేపట్టారు. ఎన్టీఆర్ జిల్లా పెనుగంచిప్రోలులో జి. విజయలక్ష్మి ఎంపీపీగా, ఆమె భర్త కృష్ణమూర్తి వైస్ ఎంపీపీగా ఎన్నికయ్యారు. మార్కాపురం జిల్లా పుల్లలచెరువులో కాకర్ల వరలక్ష్మి, ఆమె భర్త కోటయ్య కూడా ఇదే తరహాలో రెండు పదవులను దక్కించుకున్నారు. శింగనమలలో వైఎస్సార్సీపీ సభ్యులు సమావేశం నుంచి బయటకు వెళ్లడంతో ఎంపీపీ, వైస్ ఎంపీపీ పదవులు టీడీపీకి దక్కాయి. కృష్ణా జిల్లా మొవ్వలో టీడీపీ నుంచి గెలిచిన తాతా రత్నమాణిక్యం, పొత్తులో భాగంగా ఎంపీపీ పదవిని BJPకి కేటాయించడంతో ఆ పార్టీలో చేరి ఎంపీపీగా ఎన్నికయ్యారు.
మరోవైపు పలు మండలాల్లో పార్టీల మధ్య సయోధ్యలు, పరస్పర మద్దతు ఎన్నికల ఫలితాలను ప్రభావితం చేశాయి. అన్నమయ్య జిల్లా రామసముద్రంలో వైఎస్సార్సీపీ సభ్యురాలి మద్దతుతో కూటమికి ఎంపీపీ పదవి దక్కింది. పోలవరం జిల్లా వై. రామవరంలో టీడీపీ అభ్యర్థి పల్లాల వెంకటమణారెడ్డికి వైఎస్సార్సీపీ ఎంపీటీసీ సభ్యురాలు మద్దతు తెలపడంతో ఆయన విజయం సాధించారు. ఎటపాకలో వైఎస్సార్సీపీ, సీపీఐ, కాంగ్రెస్ మద్దతుతో సీపీఎం అభ్యర్థి రామారావు ఎంపీపీగా ఎన్నికయ్యారు. ద్వారకాతిరుమలలో పొత్తులో భాగంగా BJP అభ్యర్థి బోడపాటి లిల్లీపుష్పకు ఎంపీపీ పదవి దక్కింది. అనకాపల్లి జిల్లా సబ్బవరంలో వైస్ ఎంపీపీ ఎన్నిక సందర్భంగా చోటుచేసుకున్న పరిణామాలతో టీడీపీ అభ్యర్థి సత్యవతి విజయం సాధించారు. గంగాధర నెల్లూరు నియోజకవర్గం పెనుమూరులో వైఎస్సార్సీపీ సభ్యులు ఆలయంలో ప్రమాణం చేసి అనూషను ఎంపీపీగా, శిల్పను వైస్ ఎంపీపీగా గెలిపించాలని నిర్ణయించుకున్నారు. కాకినాడ జిల్లా రౌతులపూడిలో అక్కాతమ్ముళ్లు తమరాల సత్యనారాయణ, నందిపల్లి యరకయ్యమ్మ ఎంపీటీసీలుగా గెలవగా.. సత్యనారాయణ ఎంపీపీగా ఎన్నికయ్యారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!