మహిళా రిజర్వేషన్‌పై ప్రత్యేక పార్లమెంట్ సమావేశాల డిమాండ్..

మహిళా రిజర్వేషన్ల అంశాన్ని రాజకీయాల కోసం వాడకూడదని, వెంటనే ప్రత్యేక పార్లమెంట్ సమావేశాలు ఏర్పాటు చేసి లోకసభలో మహిళా రిజర్వేషన్ బిల్లు ప్రవేశపెట్టాలని ముఖ్యమంత్రి రేవంత్ రెడ్డి డిమాండ్ చేశారు. 33 శాతం మహిళా రిజర్వేషన్ బిల్లుకు ఇండియా కూటమి సంపూర్ణ మద్దతు ఇస్తుందని ఆయన తెలిపారు.

ట్యాంక్ బండ్ వద్ద రాజీవ్ గాంధీ వర్ధంతి సందర్భంగా ఆయన విగ్రహానికి నివాళులర్పించిన అనంతరం సీఎం మాట్లాడారు. దేశంలో మహిళా రిజర్వేషన్ ఆలోచనను తీసుకొచ్చిన మహనీయుడు రాజీవ్ గాంధీ అని, సాంకేతిక రంగ అభివృద్ధికి ఆయన చేసిన సేవలు మరువలేనివని అన్నారు. తెలంగాణకు గాంధీ కుటుంబంతో ప్రత్యేక అనుబంధం ఉందని, సోనియా గాంధీ నిర్ణయంతోనే తెలంగాణ రాష్ట్రం సాధ్యమైందని ఆయన పేర్కొన్నారు.