మియాపూర్ భూముల విషయంలో బీఆర్‌ఎస్‌ కుట్ర చేసింది - కాంగ్రెస్‌ నేతలు

మియాపూర్‌లోని అత్యంత విలువైన 550 ఎకరాల ప్రభుత్వ భూములను కబ్జాదారులకు అప్పగించేందుకు గత బీఆర్‌ఎస్‌ ప్రభుత్వం కుట్ర చేసిందని ప్రభుత్వ విప్‌ విజయరమణారావు, కాంగ్రెస్‌ నేతలు ఆది శ్రీనివాస్‌, అద్దంకి దయాకర్‌ ఆరోపించారు. శనివారం గాంధీభవన్‌లో నిర్వహించిన మీడియా సమావేశంలో వారు మాట్లాడుతూ.. మియాపూర్‌ భూముల కేసులో కాంగ్రెస్‌ ప్రభుత్వానికి సుప్రీంకోర్టులో చారిత్రాత్మక విజయం లభించిందని తెలిపారు. సర్వే నంబర్లు 100, 101లోని భూములు ప్రభుత్వానికే చెందుతాయని రాష్ట్ర ప్రభుత్వం బలమైన వాదనలు వినిపించిందని, అందువల్లే ఈ విజయం సాధ్యమైందని పేర్కొన్నారు.

ఇప్పటివరకు హైడ్రా రూ.1.5 లక్షల కోట్ల విలువైన భూములను కాపాడిందని, సంస్థ పునరుద్ధరించిన చెరువులు ప్రస్తుతం నీటితో కళకళలాడుతున్నాయని నాయకులు తెలిపారు. కేసీఆర్‌, ఆయన కుటుంబ సభ్యులు, బీఆర్‌ఎస్‌ నేతలు హైదరాబాద్‌తో పాటు తెలంగాణలోని విలువైన భూములను కబ్జా చేసేందుకు ప్రయత్నించారని ఆరోపించారు. మియాపూర్‌ భూముల వ్యవహారంలో దామోదర్‌రావుకు ముందుగానే విలాసవంతమైన కార్లను లంచంగా ఇచ్చారనే ఆరోపణలు ఉన్నాయని పేర్కొన్నారు. ఇలాంటి ఆరోపణలు ఎదుర్కొంటున్న వారు మియాపూర్‌ భూములను తామే కాపాడామని చెప్పుకోవడం హాస్యాస్పదమని విమర్శించారు.