రైతుల సమస్యలను పట్టించుకోని కాంగ్రెస్‌ ప్రభుత్వం- హరీశ్‌రావు

రాష్ట్రంలో రైతులు వివిధ సమస్యలతో ఇబ్బందులు పడుతుంటే ముఖ్యమంత్రి, మంత్రులు దిల్లీలో రాజకీయాలు చేయడమేంటని భారాస శాసనసభాపక్ష ఉపనేత టి.హరీశ్‌రావు ప్రశ్నించారు. రైతులకు పంటలు వేయొద్దని సూచించడాన్ని మానుకుని, విద్యుత్‌ కోతలు, నీటి కొరతను ఎదుర్కొనేందుకు ప్రభుత్వం తక్షణమే సమగ్ర కార్యాచరణ ప్రకటించాలని డిమాండ్‌ చేశారు. సోమవారం తెలంగాణ భవన్‌లో భారాస ఎమ్మెల్యేలు చింతా ప్రభాకర్‌, సంజయ్‌ తదితరులతో కలిసి నిర్వహించిన విలేకరుల సమావేశంలో ఆయన మాట్లాడారు. ఎల్‌నినో ప్రభావంపై గత తొమ్మిది నెలలుగా ప్రపంచ శాస్త్రవేత్తలు, కేంద్ర ప్రభుత్వ సంస్థలు హెచ్చరిస్తున్నప్పటికీ రాష్ట్ర ప్రభుత్వం నిర్లక్ష్యంగా వ్యవహరించిందని ఆరోపించారు. రైతులు పంటలు వేయకపోతే వారి పరిస్థితి ఏమిటని, వ్యవసాయ కూలీలు జీవనోపాధి కోసం వలసలు వెళ్లాలా అని ప్రశ్నించారు. రైతులకు భరోసా కల్పించాల్సిన ప్రభుత్వం వారిని భయాందోళనలకు గురిచేస్తోందని విమర్శించారు.

తమ ప్రభుత్వ హయాంలో వలస వెళ్లిన ప్రజలను తిరిగి స్వగ్రామాలకు తీసుకొచ్చామని, కాంగ్రెస్‌ పాలనలో మళ్లీ వలసలు వెళ్లాల్సిన పరిస్థితి ఏర్పడిందని హరీశ్‌రావు ఆరోపించారు. రాష్ట్రంలో బొగ్గు కొరత, విద్యుత్‌ సమస్యలకు ఎల్‌నినోను కారణంగా చూపడంపై అభ్యంతరం వ్యక్తం చేశారు. ఎల్‌నినోకు, బొగ్గు కొరతకు సంబంధమేంటని ప్రశ్నిస్తూ, నైనీ గనిలోని బొగ్గును ముందుగానే సేకరించి నిల్వలు ఎందుకు ఏర్పాటు చేయలేదని నిలదీశారు. ప్రభుత్వ ముందుచూపు లోపం వల్లే ఈ పరిస్థితులు ఏర్పడ్డాయని విమర్శించారు. ప్రజలకు తాగునీరు, సాగునీరు అందించడంలో ముఖ్యమంత్రి రేవంత్‌రెడ్డి ప్రభుత్వం పూర్తిగా విఫలమైందని ఆరోపిస్తూ, రైతుల సమస్యల పరిష్కారానికి తక్షణ చర్యలు తీసుకోవాలని డిమాండ్‌ చేశారు.