మహిళలకు 50 శాతం సీట్లు కేటాయిస్తాం: కవిత

తెలంగాణ రక్షణ సేన చీఫ్‌ కవిత మహిళలకు రాజకీయాల్లో మరింత ప్రాధాన్యం కల్పిస్తామని ప్రకటించారు. ఇతర రాజకీయ పార్టీలు రిజర్వేషన్లను అమలు చేసినా, చేయకపోయినా తమ పార్టీ తరఫున 50 శాతం సీట్లను మహిళలకు కేటాయిస్తామని తెలిపారు. సోమవారం బంజారాహిల్స్‌లోని పార్టీ కార్యాలయంలో నిర్వహించిన బతుకమ్మ వేడుకల్లో ఆమె మాట్లాడారు. మహిళా నాయకత్వాన్ని బలోపేతం చేయడమే తన లక్ష్యమని పేర్కొన్నారు. మహిళలు, బహుజనుల కోసం కృషి చేస్తున్న తనకు రాష్ట్ర ప్రజలు ఆశీర్వాదం అందించాలని కవిత విజ్ఞప్తి చేశారు.

రాజకీయ పార్టీ ఏర్పాటు చేసిన తర్వాత పార్టీ కార్యాలయంలో బతుకమ్మ వేడుకలు నిర్వహించడం ఆనందంగా ఉందని కవిత అన్నారు. ప్రపంచంలోనే ప్రత్యేకమైన పండుగగా బతుకమ్మకు గుర్తింపు ఉందని, తెలంగాణ సంస్కృతి, సంప్రదాయాలను ప్రపంచానికి చాటేలా ఈ వేడుకలను నిర్వహించాలని పిలుపునిచ్చారు. ప్రతి ఒక్కరూ బతుకమ్మ పాటలను నేర్చుకుని భావితరాలకు అందించాలని సూచించారు. తెలంగాణ ఉద్యమ సమయంలో బతుకమ్మ ఉద్యమ స్ఫూర్తికి ప్రతీకగా నిలిచిందని గుర్తుచేశారు. గౌరమ్మ తల్లి ఆశీస్సులతో తెలంగాణ ఆడబిడ్డలందరూ సంతోషంగా ఉండాలని ఆకాంక్షించారు.