ఫార్ములా-ఈ కేసులో కేటీఆర్‌కు కోర్టు కీలక ఆదేశాలు

ఫార్ములా-ఈ రేస్‌ కేసులో తన పేరును తొలగించాలని కోరుతూ మాజీ మంత్రి, బీఆర్ఎస్ కార్యనిర్వాహక అధ్యక్షుడు కేటీఆర్‌ నాంపల్లిలోని ఏసీబీ ప్రత్యేక కోర్టులో డిశ్ఛార్జి పిటిషన్‌ దాఖలు చేశారు. తాను ఎలాంటి అవినీతికి పాల్పడలేదని, ఏసీబీ అధికారులు చేసిన ఆరోపణలకు తగిన ప్రాథమిక ఆధారాలు లేవని పిటిషన్‌లో పేర్కొన్నారు. ఈ కేసులో ఇప్పటివరకు 21 మందిని విచారించినప్పటికీ, నిధుల దుర్వినియోగం జరిగినట్లు నిరూపించే ఆధారాలు లభించలేదని కేటీఆర్‌ తన పిటిషన్‌లో వాదించారు. ఈ నేపథ్యంలో ఛార్జిషీట్‌ నుంచి తన పేరును తొలగించాలని న్యాయస్థానాన్ని అభ్యర్థించారు.

కేటీఆర్‌ దాఖలు చేసిన డిశ్ఛార్జి పిటిషన్‌ను పరిశీలించిన ఏసీబీ ప్రత్యేక కోర్టు, దీనిపై కౌంటర్‌ దాఖలు చేయాలని ఏసీబీ అధికారులను ఆదేశించింది. తదుపరి విచారణను ఈ నెల 30వ తేదీకి వాయిదా వేసింది. కేటీఆర్‌ తన పిటిషన్‌లో చేసిన వాదనలపై ఏసీబీ సమర్పించే కౌంటర్‌ అనంతరం తదుపరి విచారణ కొనసాగనుంది.