జర్మన్ బృందంతో సీఎం చర్చలు.. హైదరాబాద్‌లో ఉద్యోగాల జల్లు!

ముఖ్యమంత్రి రేవంత్ రెడ్డి ఈరోజు జర్మనీ కాన్సుల్ జనరల్ మైకేల్ హాస్పర్ నేతృత్వంలోని బృందాన్ని ప్రగతిభవన్‌లో కలిశారు. హైదరాబాద్ అభివృద్ధి, పెట్టుబడులు, విద్యా అవకాశాలపై ఇరువురి మధ్య విస్తృత చర్చలు జరిగాయి. జర్మనీకి చెందిన డ్యుయిష్ బోర్స్ (Deutsche Börse) కంపెనీ హైదరాబాద్‌లో తమ గ్లోబల్ కేపబిలిటీ సెంటర్ (GCC)ను ప్రారంభిస్తున్నట్లు బృందం ముఖ్యమంత్రికి వివరించింది. ఈ సెంటర్ ద్వారా వచ్చే రెండేళ్లలో వెయ్యికి పైగా ఐటీ ఉద్యోగాలు సృష్టించనున్నట్లు తెలియజేసింది.

జర్మనీ బృందానికి సీఎం రేవంత్ ధన్యవాదాలు తెలుపుతూ, తెలంగాణ ప్రభుత్వం పూర్తి స్థాయి సహకారం అందిస్తుందని హామీ ఇచ్చారు. హైదరాబాద్‌ను ఇన్నోవేషన్ హబ్‌గా తీర్చిదిద్దేందుకు జర్మనీ కంపెనీల మద్దతు కావాలని సీఎం కోరారు. అలాగే, తెలంగాణ విద్యార్థులకు జర్మన్ భాష నేర్పించేందుకు, జర్మన్ టీచర్లను హైదరాబాద్‌లో నియమించే అంశాన్ని పరిగణనలోకి తీసుకోవాలని రేవంత్ సూచించారు. ఐటీ, ఫార్మా, ఆటోమొబైల్ రంగాల్లో పెట్టుబడులపై కూడా చర్చ జరిగింది. ఈ సమావేశంలో డ్యుయిష్ బోర్స్ CIO/COO డాక్టర్ క్రిస్టోఫ్ బోమ్, సీఎం ప్రత్యేక కార్యదర్శి అజిత్ రెడ్డి, విష్ణువర్ధన్ రెడ్డి, అమిత్ దేశాయ్ తదితరులు పాల్గొన్నారు.