ఆరేళ్ల క్రితం విడుదలైన జెఫ్రీ ఎప్‌స్టీన్ వెబ్ సిరీస్... ఇప్పుడు ట్రెండింగ్

గత కొన్ని రోజులుగా జెఫ్రీ ఎప్‌స్టీన్ పేరు సోషల్ మీడియాలో విస్తృతంగా చర్చకు వస్తోంది. అమెరికాలో సంచలనం సృష్టించిన భారీ సెక్స్ కుంభకోణంలో ప్రధాన పాత్రధారి అయిన ఎప్‌స్టీన్, 1980 – 90 దశకాల్లో పేద మరియు మధ్యతరగతి యువతులను డబ్బు ఆశ చూపించి తన నివాసాలకు పిలిపించి లైంగిక దాడులకు పాల్పడ్డాడనే ఆరోపణలు ఎదుర్కొన్నాడు. బాధితురాలికి డబ్బు ఇచ్చి, మరో యువతిని తీసుకొస్తే మరింత కమీషన్ ఇస్తానని చెప్పేవాడని అప్పట్లో వెల్లడైంది. ఈ అక్రమ వ్యవహారం దాదాపు రెండు దశాబ్దాల పాటు సాగి, 2005 లో బట్టబయలైంది. 

2005 లో ఎప్‌స్టీన్‌ను అరెస్ట్ చేసి కొన్ని నెలలు జైలులో ఉంచారు. తర్వాత 2019 లో మీటూ(MeToo) ఉద్యమం సమయంలో మరోసారి ఆరోపణలు రావడంతో మళ్లీ అరెస్ట్ చేశారు. అదే ఏడాది ఆగస్టులో జైలులోనే అనుమానాస్పద పరిస్థితుల్లో అతడు మృతి చెందాడు. పోలీసులు దీనిని ఆత్మహత్యగా పేర్కొన్నప్పటికీ, ఇప్పటికీ అనేక అనుమానాలు కొనసాగుతున్నాయి. ఎప్‌స్టీన్ మరణించిన ఏడాది తర్వాత, అతడి జీవితంపై ఆధారంగా ‘జెఫ్రీ ఎప్‌స్టీన్: ఫిల్తీ రిచ్’ అనే నాలుగు ఎపిసోడ్ల డాక్యుమెంటరీ నెట్‌ఫ్లిక్స్‌లో విడుదలైంది. ఈ సిరీస్‌కు లిసా బ్రయంట్ దర్శకత్వం వహించారు.

ఇటీవల ఎప్‌స్టీన్ ఫైల్స్ మళ్లీ వైరల్ కావడంతో, ఆరేళ్ల క్రితం విడుదలైన ఈ డాక్యుమెంటరీ మరోసారి ట్రెండింగ్‌లోకి వచ్చింది. ఇందులో టీచర్ స్థాయి నుంచి ఫైనాన్షియర్‌గా అతడు ఎలా ఎదిగాడు, లైంగిక నేరాలు ఎలా చేశాడు, బాధితుల బాధలు ఏంటి, చివరకు జైలులో అతడి మరణానికి దారి తీసిన పరిస్థితులు ఏమిటి అన్న అంశాలను చూపించారు. అలాగే ఎప్‌స్టీన్ ఫైల్స్‌లో బిల్ క్లింటన్, ఎలాన్ మస్క్, డొనాల్డ్ ట్రంప్, బిల్ గేట్స్ వంటి ప్రముఖుల పేర్లు ఉండటం ఇప్పుడు పెద్ద చర్చకు దారి తీస్తోంది.