మహిళల భవిష్యత్తుపై మంత్రి పొన్నం ప్రభాకర్‌తో ఉదయ భాను భేటీ

ప్రముఖ టెలివిజన్ యాంకర్ మరియు నటి ఉదయ భాను తాజాగా తెలంగాణ బీసీ సంక్షేమ మరియు రవాణా శాఖ మంత్రి పొన్నం ప్రభాకర్ ను కలిశారు. తెలంగాణలో బలహీన వర్గాలకు చెందిన అణగారిన మహిళల సంక్షేమం, భవిష్యత్తు గురించి ఆమె మంత్రి గారితో చర్చించారు. సినిమా రంగం, వ్యాపార రంగం వంటి విభిన్న రంగాల్లో మహిళలకు మరిన్ని అవకాశాలు కల్పించాల్సిన అవసరం ఉందని ఆమె అభిప్రాయాన్ని వ్యక్తం చేశారు. అలాగే మహిళలకు ఉపాధి అవకాశాలు పెంచేందుకు చర్యలు తీసుకోవాలని కోరారు.

ఈ సందర్భంగా మంత్రి పొన్నం ప్రభాకర్, మహిళల అభివృద్ధి కోసం ఉదయ భాను చూపిస్తున్న చొరవను ప్రశంసించారు. అణగారిన మహిళలు ఆత్మవిశ్వాసంతో, గౌరవంతో ముందుకు సాగేందుకు మరింత బలమైన వేదికలు ఎలా సృష్టించవచ్చో అనే అంశంపై ఇద్దరూ చర్చించారు. మహిళల సంక్షేమం కోసం ఆమె తీసుకుంటున్న ప్రయత్నాలకు తన పూర్తి మద్దతు ఉంటుందని మంత్రి హామీ ఇచ్చారు. తన ఆలోచనలకు ప్రోత్సాహం ఇచ్చినందుకు ఉదయ భాను మంత్రి గారికి కృతజ్ఞతలు తెలియజేస్తూ, అణగారిన మహిళల సాధికారత కోసం తన ప్రయత్నాలను కొనసాగిస్తానని తెలిపారు.