ఈ నెల 16 నుంచి మున్సిపల్ ఎన్నికల ప్రచారం..

సంక్రాంతి పండగ తరవాత మున్సిపల్‌ ఎన్నికల ప్రచారానికి ముఖ్యమంత్రి రేవంత్‌రెడ్డి శ్రీకారం చుట్టబోతున్నారు. ఈ నెల 16 న ఉమ్మడి ఆదిలాబాద్‌ జిల్లాలో పలు అభివృద్ధి కార్యక్రమాలకు శంకుస్థాపనలు, ప్రారంభోత్సవాలతో పర్యటన ప్రారంభిస్తారు. ఈ సందర్భంగా బహిరంగసభలో ప్రసంగిస్తారు. అదే రోజు సదర్‌మాట్ బ్యారేజీ ప్రారంభం, చనాఖా–కోర్ట ప్రాజెక్టు సందర్శన కూడా ఉండనుంది. ఈ కార్యక్రమాలతోనే మున్సిపల్‌ ఎన్నికల ప్రచారాన్ని ముఖ్యమంత్రి ప్రారంభించనున్నారు. వాస్తవానికి ఫిబ్రవరి 3 న జడ్చర్లలో నిర్వహించే బహిరంగ సభతో ప్రచారం ప్రారంభించాలని అనుకున్నా సమయం సరిపోదని.. అంతకన్నా ముందే జరపాలని తాజాగా నిర్ణయించారు.

ఈ నెల 17న జడ్చర్లలో ట్రిపుల్ ఐటీ నిర్మాణానికి, మహబూబ్‌నగర్‌లో అభివృద్ధి పనులకు సీఎం శంకుస్థాపనలు చేసి బహిరంగ సభలో మాట్లాడతారు. 18 న పాలేరులో అభివృద్ధి కార్యక్రమాల అనంతరం ఖమ్మం పట్టణంలో ఉమ్మడి ఖమ్మం జిల్లా కాంగ్రెస్ కార్యకర్తల సమావేశంలో పాల్గొని, సీపీఐ వందేళ్ల సభకు హాజరవుతారు. అనంతరం ములుగు జిల్లా మేడారంలో రాత్రి బస చేస్తారు. 19 న ఉదయం సమ్మక్క – సారలమ్మ గద్దెలను ప్రారంభించి మొక్కులు తీర్చుకుని హైదరాబాద్‌కు చేరుకుంటారు. అదే సాయంత్రం దావోస్‌కు వెళ్లి, అక్కడి నుంచి అమెరికా పర్యటనకు వెళ్లనున్నారు. ఫిబ్రవరి 1 న తిరిగి హైదరాబాద్‌కు వచ్చే అవకాశం ఉందని పార్టీ వర్గాలు తెలిపాయి. ఈ వివరాలను ప్రభుత్వం ఇంకా అధికారికంగా ప్రకటించలేదు.

ఫిబ్రవరి 3 నుంచి హైదరాబాద్ మినహా మిగిలిన 9 ఉమ్మడి జిల్లాల్లో కాంగ్రెస్ పార్టీ భారీ బహిరంగ సభలు నిర్వహించనుంది. ఒక్కోచోట లక్ష మందితో సభలు నిర్వహించి మున్సిపల్ ఎన్నికల్లో 90 శాతం వార్డులు, ఛైర్మన్ పదవులు గెలవడమే లక్ష్యంగా ప్రచారం సాగించనుంది. ఈ సభల పర్యవేక్షణ బాధ్యతలను ఉమ్మడి జిల్లాల ఇన్‌ఛార్జి మంత్రులకు అప్పగించేందుకు పీసీసీ ప్రణాళికలు రూపొందించింది. ఏఐసీసీ రాష్ట్ర ఇన్‌ఛార్జి మీనాక్షి నటరాజన్, సీఎం రేవంత్ రెడ్డితో చర్చల అనంతరం మంత్రుల జాబితాను ప్రకటిస్తామని పీసీసీ అధ్యక్షుడు మహేశ్‌కుమార్ గౌడ్ తెలిపారు.