సంక్రాంతికి భారీ ఏర్పాట్లు.. 5 వేలకుపైగా స్పెషల్ బస్సులు

సంక్రాంతి పండుగను పురస్కరించుకుని ప్రయాణికులకు ఎలాంటి ఇబ్బందులు లేకుండా టీజీఎస్‌ఆర్‌టీసీ భారీ ఏర్పాట్లు చేస్తోంది. పండగ రద్దీని దృష్టిలో పెట్టుకుని రాష్ట్రవ్యాప్తంగా 5 వేలకుపైగా ప్రత్యేక బస్సులు నడపాలని ప్రణాళికలు రూపొందించింది. తెలంగాణలోని వివిధ జిల్లాలకు సుమారు 2,500 బస్సులు, ఆంధ్రప్రదేశ్‌కు దాదాపు 3,000 ప్రత్యేక బస్సులు నడపనున్నారు. జనవరి 9వ తేదీ నుంచి ప్రయాణికుల రద్దీకి అనుగుణంగా ఈ బస్సులు అందుబాటులోకి రానున్నాయి.

సంక్రాంతికి సొంతూళ్లకు వెళ్లే వారికి సౌకర్యవంతమైన ప్రయాణం కల్పించడమే లక్ష్యంగా ఈ నిర్ణయం తీసుకున్నట్లు ఆర్టీసీ అధికారులు తెలిపారు. స్పెషల్ బస్సుల రూట్లు, టైమింగ్స్‌కు సంబంధించిన పూర్తి వివరాలను ఒకటి రెండు రోజుల్లో ప్రకటించనున్నట్లు వెల్లడించారు. పండగ ప్రయాణాల కోసం ముందుగానే ప్రణాళిక వేసుకోవాలని ప్రయాణికులకు అధికారులు సూచిస్తున్నారు.