‘రజనీకాంత్‌లా కావాలనుకుని తప్పు చేశా’ - మాధవన్

వైవిధ్యమైన పాత్రలతో ప్రేక్షకులను అలరిస్తున్న ఆర్. మాధవన్ తాజాగా తన కెరీర్‌లో ఎదురైన ఓ కీలక అనుభవాన్ని పంచుకున్నారు. ఒక దశలో రజనీకాంత్‌లా సూపర్‌స్టార్ స్థాయికి చేరుకోవాలంటే బీ, సీ సెంటర్ల ప్రేక్షకులను ఆకట్టుకోవాల్సిందేనని కొందరు తనకు సలహా ఇచ్చారని తెలిపారు. ఆ సూచనల ప్రభావంతో తనకు పూర్తిగా సరిపోని ఓ మాస్ కథకు అంగీకరించినట్లు వెల్లడించారు.

ఆ సినిమాలో చదువు లేని, జీవిత పోరాటంలో ఉన్న యువకుడి పాత్రలో నటించానని, మాస్ అంశాలతో రూపొందించినప్పటికీ సినిమా బాక్సాఫీస్ వద్ద ఘోరంగా విఫలమైందని చెప్పారు. ఆ పరాజయం తనకు గొప్ప గుణపాఠం నేర్పిందని, ఇతరుల సలహాలను అంధంగా అనుసరించకుండా తన బలాలు, అభిరుచులకు అనుగుణంగా నిర్ణయాలు తీసుకోవాలని అర్థమైందన్నారు. ఆ అనుభవమే తన కెరీర్‌ను కొత్త దిశలో నడిపిందని మాధవన్ పేర్కొన్నారు.