తుపాను బాధితులకు చంద్రబాబు భారీ ఊరట.. వివిధ వర్గాలకు ఆర్థిక సాయం ప్రకటన!

ఆంధ్రప్రదేశ్‌లో తుపాను ప్రభావంతో నష్టపోయిన ప్రజలను ఆదుకునేందుకు ముఖ్యమంత్రి చంద్రబాబు నాయుడు ఆర్థిక సాయాన్ని ప్రకటించారు. దెబ్బతిన్న ఇళ్లకు రూ.10,000, నష్టపోయిన కిరాణా దుకాణాలు, రెస్టారెంట్ల యజమానులకు రూ.25,000 చొప్పున అందించనున్నట్లు ప్రకటించారు. తుపాను కారణంగా సహాయక శిబిరాల్లో ఉంటున్న వారికి ఒక్కొక్కరికి రూ.3,000 ఇవ్వనున్నారు. తుపానులో ప్రాణాలు కోల్పోయిన వారి కుటుంబాలకు రూ.5 లక్షల పరిహారం అందించనున్నారు.

చిన్న, మధ్యతరహా పరిశ్రమల్లో అర్హత కలిగిన వాటికి రూ.1 లక్ష చొప్పున ఆర్థిక సాయం అందించనున్నారు. దెబ్బతిన్న ద్విచక్ర వాహనాలకు రూ.3,000, త్రిచక్ర వాహనాలకు రూ.10,000 చొప్పున సాయం ప్రకటించారు. మత్స్యకారులను ఆదుకునేందుకు దెబ్బతిన్న చేపల వేట పడవలకు రూ.9,000, వలల మరమ్మతుల కోసం రూ.5,000 అందించనున్నారు. తుపాను కారణంగా జీవనోపాధి కోల్పోయిన బాధితులు తిరిగి సాధారణ స్థితికి చేరుకునేందుకు ఈ సాయం ఉపయోగపడనుంది.