ఇండస్ట్రీ వివక్షపై తాప్సీ పన్ను సంచలన వ్యాఖ్యలు

బాలీవుడ్ నటి తాప్సీ పన్ను లేడీ ఓరియంటెడ్ సినిమాలు, సస్పెన్స్ థ్రిల్లర్లు, కమర్షియల్ చిత్రాల్లో నటిస్తూ తనకంటూ ప్రత్యేక గుర్తింపు సంపాదించుకున్నారు. సినీ నేపథ్యం లేకుండానే స్వయంకృషి, ప్రతిభతో స్టార్ స్థాయికి చేరుకున్న ఆమె తాజాగా ఇండస్ట్రీలో తాను ఎదుర్కొన్న వివక్షపై మాట్లాడారు. తన వెనుక స్టార్ కుటుంబం, గాడ్‌ఫాదర్ లేదా పెద్ద స్టూడియో అండదండలు లేకపోవడం వల్లే కొంతమంది తన ఎదుగుదలను అంగీకరించలేకపోతున్నారని తాప్సీ అభిప్రాయపడ్డారు. ముఖ్యంగా బాలీవుడ్ స్టార్ షారూఖ్ ఖాన్ సరసన రాజ్‌కుమార్ హిరానీ దర్శకత్వంలో తెరకెక్కిన ‘డంకీ’ సినిమాలో ప్రధాన పాత్ర ఆఫర్ వచ్చినప్పుడు ఇండస్ట్రీలో చాలామంది ఆశ్చర్యపోయారని గుర్తుచేసుకున్నారు. షారూఖ్ ఖాన్ వ్యక్తిగత పరిచయ వర్గంతో తనకు సంబంధాలు లేవని, అంతకుముందు రాజ్‌కుమార్ హిరానీతో కూడా కలిసి పనిచేయలేదని ఆమె స్పష్టం చేశారు.

మరో సినిమాలో తన నటన నచ్చడంతో రాజ్‌కుమార్ హిరానీ తనను కార్యాలయానికి పిలిపించారని, ఆ తర్వాత ‘డంకీ’ కథ వినిపిస్తానని చెప్పినప్పుడు తాను మొదట నమ్మలేకపోయానని తాప్సీ వెల్లడించారు. ఎలాంటి సినీ పరిచయాలు లేకుండానే ఆ సినిమాలో అవకాశం దక్కించుకోవడాన్ని కొంతమంది జీర్ణించుకోలేకపోయారని ఆమె అన్నారు. తన వ్యక్తిగత విషయాలు ఎక్కువగా బయటకు తెలియకపోవడాన్ని ఆసరాగా చేసుకుని, తనతో పనిచేయడం కష్టమని, ఇతరులు ఆమెతో కలిసి పనిచేయడానికి ఇష్టపడరని తప్పుడు ప్రచారాలు చేశారని ఆరోపించారు. అయితే, ఇలాంటి వ్యాఖ్యలు తనను వెనక్కి తగ్గించలేవని తాప్సీ స్పష్టం చేశారు. ఎలాంటి అండదండలు లేకుండా తన ప్రతిభను, కష్టాన్ని నమ్ముకుని ఇండస్ట్రీలో నిలదొక్కుకున్నందుకు గర్వంగా ఉందని, తనను ఒకే మూసలో ఇరికించడం ఎవరికీ సాధ్యం కాదని పేర్కొన్నారు.