బ్యాలెట్‌ పేపర్లతో ఎన్నికలు జరిగినా కాంగ్రెస్‌కు ఒక్క సీటు రాలేదు.. మోదీ సెటైర్లు!

నాలుగు రాష్ట్రాల్లో జరిగిన ఎమ్మెల్సీ ఎన్నికల్లో కాంగ్రెస్‌ పార్టీ ప్రదర్శనపై ప్రధానమంత్రి నరేంద్ర మోదీ వ్యంగ్యాస్త్రాలు సంధించారు. ఉత్తర్‌ప్రదేశ్‌, మహారాష్ట్ర, బిహార్‌, కర్ణాటక రాష్ట్రాల్లో 28 ఎమ్మెల్సీ స్థానాలకు బ్యాలెట్‌ పత్రాల ద్వారా ఎన్నికలు జరిగాయని, మరి కాంగ్రెస్‌ ఎన్ని స్థానాలు గెలుచుకుందో చెప్పాలంటూ అక్టోబర్‌ 28న ఎక్స్‌ వేదికగా ప్రశ్నించారు. ఎన్నికల్లో బ్యాలెట్‌ పత్రాలను ఉపయోగించాలని కాంగ్రెస్‌ డిమాండ్‌ చేస్తున్న నేపథ్యంలో మోదీ వ్యాఖ్యలు ప్రాధాన్యం సంతరించుకున్నాయి. అక్టోబర్‌ 23న పోలింగ్‌ జరగగా, అక్టోబర్‌ 27 నుంచి ఓట్ల లెక్కింపు ప్రారంభమైంది. ఈ ఎన్నికల్లో కాంగ్రెస్‌ తాను పోటీ చేసిన స్థానాల్లో ఒక్క విజయం కూడా సాధించలేకపోయిందని వార్తా నివేదికలు వెల్లడించాయి.

కర్ణాటకలో అధికార కాంగ్రెస్‌కు గట్టి ఎదురుదెబ్బ తగిలింది. అక్కడి నాలుగు స్థానాలనూ బీజేపీ-జేడీఎస్‌ కూటమి కైవసం చేసుకుంది. బీజేపీ మూడు స్థానాలను నిలబెట్టుకోగా, జేడీఎస్‌ బెంగళూరు ఉపాధ్యాయ నియోజకవర్గాన్ని గెలుచుకుంది. ఉత్తర్‌ప్రదేశ్‌లో 11 స్థానాలకు గానూ అప్పటికి బీజేపీ ఐదు, సమాజ్‌వాదీ పార్టీ మూడు స్థానాల్లో విజయం సాధించాయి. బిహార్‌లో బీజేపీ, జేడీయూ, ఆర్జేడీ, జనసురాజ్‌ పార్టీ, స్వతంత్ర అభ్యర్థులు వివిధ స్థానాల్లో గెలుపొందగా, మహారాష్ట్రలో ఓట్ల లెక్కింపు కొనసాగుతోంది. మిగిలిన స్థానాల పూర్తి ఫలితాలు వెలువడాల్సి ఉన్న సమయంలో మోదీ చేసిన వ్యాఖ్యలు రాజకీయ చర్చకు దారితీశాయి.