‘టాక్సిక్’ ట్రైలర్‌పై రిషికా సింగ్ తీవ్ర విమర్శలు

రాకింగ్ స్టార్ యష్ హీరోగా తెరకెక్కుతున్న ‘టాక్సిక్’ చిత్ర ట్రైలర్‌పై కన్నడ నటి రిషికా సింగ్ తీవ్ర అభ్యంతరం వ్యక్తం చేశారు. సోషల్ మీడియాలో విడుదల చేసిన ఓ వీడియోలో ఆమె ట్రైలర్‌లోని మహిళల పాత్రల చిత్రీకరణ, బోల్డ్ సన్నివేశాలు, రొమాంటిక్ సీన్స్, కొన్ని సంభాషణలను తప్పుబట్టారు. మహిళలను మరింత గౌరవప్రదంగా చూపించాల్సిన అవసరం ఉందని ఆమె పేర్కొన్నారు.

ఈ సినిమాలో నయనతార, కియారా అద్వానీ వంటి ప్రముఖ నటీమణులు ఉన్నప్పటికీ, వారి స్థాయికి తగ్గట్టుగా పాత్రలను చూపించలేదని రిషికా ఆరోపించారు. ముఖ్యంగా ట్రైలర్‌లో ఓ మహిళను ఉద్దేశించి ఆమె ‘రేట్ ఎంత?’ అని అడిగే విధంగా ఉన్న సంభాషణపై తీవ్ర అభ్యంతరం వ్యక్తం చేశారు. భార్యకు భర్తగా, పిల్లలకు తండ్రిగా ఉన్న యష్ ఇలాంటి కంటెంట్‌కు ఎలా అంగీకరించారని ఆమె ప్రశ్నించారు.

దర్శకురాలు గీతూ మోహన్‌దాస్, యష్‌ల నిర్ణయాలపైనా రిషికా ప్రశ్నలు లేవనెత్తారు. స్థానిక సంస్కృతి, విలువలను కూడా సినిమాల్లో పరిగణనలోకి తీసుకోవాలని సూచించారు. మహిళలకు తగిన గౌరవం ఇవ్వకపోతే కర్ణాటకలో తీవ్ర వ్యతిరేకత ఎదుర్కోవాల్సి వస్తుందని ఆమె హెచ్చరించారు. చివర్లో “నేను కూడా టాక్సిక్” అంటూ తన వ్యాఖ్యలను ముగించారు.