‘కరుప్పు’ తర్వాత సూర్య ఖాతాలో మరో భారీ విజయం!

కోలీవుడ్ స్టార్ హీరో సూర్య నటించిన ‘కరుప్పు’ ఘన విజయం సాధించడంతో ఆయన తదుపరి చిత్రంపై సహజంగానే భారీ అంచనాలు ఏర్పడ్డాయి. అయితే క్లాస్, ఫ్యామిలీ డ్రామాగా తెరకెక్కిన ‘విశ్వనాథ్ అండ్ సన్స్’కు బుకింగ్స్ ఎలా ఉంటాయనే సందేహాలు వ్యక్తమయ్యాయి. కానీ అందరి అంచనాలను తలకిందులు చేస్తూ ఈ సినిమాకు అద్భుతమైన స్పందన లభిస్తోంది. గత 24 గంటల్లో బుక్ మై షోలో ఏకంగా 4 లక్షలకు పైగా టికెట్లు అమ్ముడైనట్లు సమాచారం. ‘కరుప్పు’ ప్రీ సేల్స్‌కు దాదాపు సమానంగా ఈ సంఖ్య ఉండటం విశేషం. ప్రీ సేల్స్, తొలి రోజు అమ్మకాలు కలిపి 7 లక్షలకు పైగా టికెట్లు అమ్ముడైనట్లు టాక్ వినిపిస్తోంది.

సూర్య మాస్ సినిమాతోనే కాదు, క్లాస్ కంటెంట్‌తోనూ తన మార్కెట్ సత్తా చూపిస్తున్నారని ఈ స్పందన స్పష్టం చేస్తోంది. వరుస విజయాలతో ప్రేక్షకుల్లో ఆయనపై నమ్మకం మరింత పెరిగినట్లు కనిపిస్తోంది. ముఖ్యంగా కుటుంబ ప్రేక్షకులను లక్ష్యంగా చేసుకున్న ఈ చిత్రానికి మొదటి నుంచే బుకింగ్స్ ఊపందుకోవడం చిత్ర బృందానికి ఉత్సాహాన్ని ఇచ్చింది. వెంకీ అట్లూరి దర్శకత్వంలో తెరకెక్కిన ఈ సినిమాను నాగవంశీ నిర్మించారు. ‘కరుప్పు’ తర్వాత సూర్య నుంచి వస్తున్న చిత్రం కావడంతో సహజంగానే ఆసక్తి పెరిగింది. ఇప్పుడు వచ్చిన ప్రీ సేల్ స్పందన చూస్తే సినిమా విడుదల తర్వాత కూడా మంచి వసూళ్లు సాధించే అవకాశాలు కనిపిస్తున్నాయి. క్లాస్ కథతో సైతం సూర్య బాక్సాఫీస్ వద్ద తన జోరు కొనసాగిస్తున్నారని చెప్పొచ్చు.