ప్రెగ్నెన్సీ క్రేవింగ్స్‌ గురించి వెల్లడించిన సమంత

తల్లి కాబోతున్న ఆనందంలో ఉన్న నటి సమంత.. గర్భధారణ సమయంలో తనకు ఇష్టంగా అనిపిస్తున్న ఆహార పదార్థాల గురించి తాజాగా వెల్లడించారు. దక్షిణాది సంప్రదాయ వంటకాలంటే తనకు ఎంతో ఇష్టమని చెప్పారు. జీవితాంతం ఒకే రకమైన ఆహారం తీసుకోవాల్సి వస్తే ఉదయం ఇడ్లీ, మధ్యాహ్నం పెరుగన్నం, రాత్రికి దోశను ఎంచుకుంటానని తెలిపారు. ప్రస్తుతం గర్భంతో ఉన్నందున ఇవే ఎక్కువగా తినాలనిపిస్తున్నాయని, భవిష్యత్తులో తన ఇష్టాలు మారవచ్చని సరదాగా పేర్కొన్నారు.

సమంత గతేడాది దర్శకుడు, నిర్మాత రాజ్ నిడిమోరును వివాహం చేసుకున్న విషయం తెలిసిందే. ఇటీవల వారి సీమంతం వేడుక కూడా సంప్రదాయబద్ధంగా జరిగింది. గత జూన్‌లో ‘మా ఇంటి బంగారం’ సినిమా విజయోత్సవ కార్యక్రమంలో తల్లి కాబోతున్న విషయాన్ని సమంత అధికారికంగా వెల్లడించారు. ప్రస్తుతం ఆమె ‘సెలబ్రిటీ మాస్టర్ చెఫ్ తమిళం’ కార్యక్రమానికి హోస్ట్‌గా వ్యవహరిస్తుండగా, రాజ్ అండ్ డీకే తెరకెక్కించనున్న భవిష్యత్ ప్రాజెక్టుల్లోనూ నటించనున్నట్లు సమాచారం.