‘అరవింద్’తో కొత్త సంగీత ప్రయాణం ప్రారంభించిన రాక్‌స్టార్ అనిరుద్

సంగీత సంచలనం, రాక్‌స్టార్ అనిరుద్ రవిచందర్ తన సంగీత ప్రయాణంలో మరో కొత్త అధ్యాయానికి శ్రీకారం చుట్టారు. తన సొంత ఇండిపెండెంట్ లేబుల్ ‘అల్బుకర్కీ రికార్డ్స్’తో పాటు యూనివర్సల్ మ్యూజిక్ ఇండియాతో కలిసి రూపొందించిన తొలి పాట ‘అరవింద్’ను విడుదల చేశారు. తెలుగు, తమిళ భాషల్లో రూపొందిన ఈ ఒరిజినల్ పాప్-హిప్ హాప్ ట్రాక్ ద్వారా సినిమా సంగీతానికి అతీతంగా తన సృజనాత్మక ప్రపంచాన్ని మరింత విస్తరించే ప్రయత్నం చేశారు.

2012లో విడుదలైన ‘వై దిస్ కొలవెరి డి’తో దేశవ్యాప్తంగా గుర్తింపు తెచ్చుకున్న అనిరుద్, అనంతరం జైలర్, విక్రమ్, లియో, కూలీ, దేవర పార్ట్-1, జవాన్ వంటి బ్లాక్‌బస్టర్ చిత్రాలకు సంగీతం అందించి అగ్ర సంగీత దర్శకుడిగా ఎదిగారు. ‘అరవింద్’ పాటలో స్వతంత్ర కళాకారుడు ఎదుర్కొనే సవాళ్లు, పోటీ, అవకాశాల కోసం చేసే పోరాటాన్ని హృద్యంగా చూపించారు. ఈ పాటలోని అరవింద్ పాత్ర అనిరుద్ జీవితానికే ప్రతిబింబమని ఆయన పేర్కొన్నారు. తన ఎదుగుదలలో ఎదురైన కష్టాలను గుర్తు చేస్తూ, ఇలాంటి ప్రయాణంలో ఉన్న ఇతర కళాకారులకు ప్రేరణనివ్వాలనే ఉద్దేశంతో ఈ పాటను రూపొందించినట్లు తెలిపారు.