రెండుమూడేళ్లలోనే దర్శకత్వ అరంగేట్రం.. రణ్‌బీర్ కపూర్ భారీ ప్లాన్

బాలీవుడ్ స్టార్ హీరో రణ్‌బీర్ కపూర్ తన కెరీర్‌కు సంబంధించి ఆసక్తికర విషయాలు వెల్లడించారు. నితేశ్ తివారీ దర్శకత్వంలో తెరకెక్కుతున్న ‘రామాయణ’తో ప్రేక్షకుల ముందుకు రానున్న ఆయన.. మరో పదేళ్ల పాటు మాత్రమే నటుడిగా కొనసాగాలని భావిస్తున్నట్లు తెలిపారు. ఆ తర్వాత పూర్తిస్థాయిలో దర్శకత్వంపై దృష్టి సారించనున్నట్లు వెల్లడించారు. ఇప్పటికే ఓ కథ రాయడం ప్రారంభించానని, మరో రెండు మూడేళ్లలో దర్శకుడిగా తన తొలి సినిమాను ప్రారంభించాలని లక్ష్యంగా పెట్టుకున్నట్లు చెప్పారు. ‘లైఫ్ ఈజ్ బ్యూటిఫుల్’, ‘ఇట్స్ ఏ వండర్‌ఫుల్ లైఫ్’, రాజ్‌కుమార్ హిరాణీ చిత్రాల తరహాలో అందరికీ నచ్చే కుటుంబ కథాచిత్రాన్ని రూపొందించాలని ఉందని పేర్కొన్నారు.

తాను ఏడాదికి సుమారు 100 నుంచి 125 రోజులు మాత్రమే షూటింగ్‌లో పాల్గొంటానని, మిగిలిన సమయంలో కథలు రాసేందుకు అవకాశం ఉంటుందని రణ్‌బీర్ తెలిపారు. తన దర్శకత్వంలో తెరకెక్కే తొలి సినిమాలో తానే హీరోగా నటించాలనే ఆలోచన లేదని స్పష్టం చేశారు. దర్శకుడిగా మారడానికి ముందు ‘బ్రహ్మాస్త్ర 2’, ‘యానిమల్ 2’, ‘రామాయణ: పార్ట్ 2’ చిత్రాలను పూర్తి చేయాలని భావిస్తున్నట్లు చెప్పారు. ప్రస్తుతం సంజయ్ లీలా భన్సాలీ దర్శకత్వంలో రూపొందుతున్న ‘లవ్ అండ్ వార్’లో అలియా భట్, విక్కీ కౌశల్‌తో కలిసి నటిస్తున్నారు. ఈ చిత్రం వచ్చే ఏడాది జనవరి 21న విడుదల కానుంది.