రామాయణ ఓటీటీ డీల్ కు నో చెప్పిన నిర్మాత

దర్శకుడు నితేశ్ తివారీ తెరకెక్కిస్తున్న రామాయణ మూవీ నుంచి రణ్‌బీర్ కపూర్ రాముడి పాత్రలో కనిపించే గ్లింప్స్ విడుదలై భారీ హైప్ తెచ్చింది. అయోధ్యలోకి ఆయన ఎంట్రీ సీన్ ప్రేక్షకులను మంత్రముగ్ధులను చేస్తోంది. ఈ చిత్రంలో సాయి పల్లవి సీతగా నటిస్తున్నారు. నిర్మాత నమిత్ మల్హోత్రాతో పాటు యష్ ఈ భారీ ప్రాజెక్ట్‌ను నిర్మిస్తున్నారు. రెండు భాగాలుగా రూపొందుతున్న ఈ చిత్రం మొత్తం దాదాపు రూ. 4000 కోట్ల బడ్జెట్‌తో తెరకెక్కుతుందని సమాచారం. మొదటి భాగం ఈ ఏడాది దీపావళి కానుకగా విడుదల కానుంది.

ఇదిలా ఉంటే, ఈ సినిమాకు సంబంధించిన ఓటీటీ హక్కుల కోసం దాదాపు రూ. 1000 కోట్ల భారీ ఆఫర్ వచ్చినట్లు వార్తలు వినిపిస్తున్నాయి. అయితే ఈ డీల్‌ను నిర్మాత నమిత్ మల్హోత్రా తిరస్కరించినట్లు సమాచారం. తక్షణ లాభం కంటే దీర్ఘకాలిక గ్లోబల్ మార్కెట్‌ను దృష్టిలో ఉంచుకుని ఈ నిర్ణయం తీసుకున్నారని తెలుస్తోంది. ప్రపంచవ్యాప్తంగా థియేటర్లలో విడుదల చేసి భారీ వసూళ్లు సాధించాలని నిర్మాతలు భావిస్తున్నారు. ఈ నిర్ణయం సినీ వర్గాలను ఆశ్చర్యపరిచినప్పటికీ, ప్రాజెక్ట్‌పై ఉన్న నమ్మకాన్ని స్పష్టం చేస్తోంది. దీంతో రామాయణ సినిమాపై అంచనాలు మరింతగా పెరుగుతున్నాయి.