‘అనకాపల్లి’ నుంచి ‘ఎలాగే పిల్ల’ పాట విడుదల..

విక్రమ్ సాహిదేవ్, సంధ్య వశిష్ఠ జంటగా నటిస్తున్న ‘అనకాపల్లి’ చిత్రం ఆగస్టు 7న ప్రేక్షకుల ముందుకు రానుంది. ఖగేష్ తమ్మినేని దర్శకత్వంలో రూపొందుతున్న ఈ రా అండ్ రస్టిక్ ఎంటర్‌టైనర్‌ను కండ్రేగుల నాయుడు, త్రినాథరావు నక్కిన భవ్య శ్రీ మూవీ మేకర్స్, నక్కిన నేరేటివ్స్ బ్యానర్లపై నిర్మిస్తున్నారు. ఇప్పటికే విడుదలైన టీజర్‌తో పాటు ‘అమ్మోరు దిగినది’, ‘లబ్బరు బొమ్మ’ పాటలు మంచి ఆదరణ పొందాయి.

తాజాగా ప్రముఖ నిర్మాత సూర్యదేవర నాగ వంశీ చేతుల మీదుగా ‘ఎలాగే పిల్ల’ రొమాంటిక్ సాంగ్‌ను విడుదల చేశారు. ఈ సందర్భంగా చిత్రబృందానికి ఆయన శుభాకాంక్షలు తెలిపారు. అనంత శ్రీరామ్ సాహిత్యం అందించిన ఈ పాటను కపిల్ కపిలన్, డావ్జాండ్ ఆలపించగా, ప్రధాన జంట మధ్య ప్రేమను అందంగా ఆవిష్కరించింది. సరళమైన కొరియోగ్రఫీ, ఆకట్టుకునే ట్యూన్, లిరికల్ వీడియోలోని విజువల్స్ ఈ పాటను సోషల్ మీడియాలో మరో వైరల్ హిట్‌గా నిలబెడతాయని చిత్రబృందం ఆశాభావం వ్యక్తం చేస్తోంది.