సంక్రాంతి బరిలోకి ‘పిక్నిక్’.. టైటిల్‌తో పాటు రిలీజ్ డేట్ కూడా ఫిక్స్!

‘ప్రేమలు’, ‘బెత్లెహెమ్ కుటుంబ యూనిట్’ వంటి చిత్రాల తర్వాత భావనా స్టూడియోస్ తన తదుపరి ప్రాజెక్ట్‌ను అధికారికంగా ప్రకటించింది. ప్రముఖ నటుడు ఫహద్ ఫాజిల్, దర్శకుడు దిలీష్ పోతన్, రచయిత శ్యామ్ పుష్కరన్ ఈ సినిమాతో భాగస్వాములుగా ఉండగా, ‘ప్రేమలు’, ‘బెత్లెహెమ్ కుటుంబ యూనిట్’ చిత్రాలకు కో-రైటర్‌గా పనిచేసిన కిరణ్ జోసీ ఈ సినిమాతో దర్శకుడిగా పరిచయం కానున్నారు. తాజాగా మేకర్స్ టైటిల్ పోస్టర్‌ను విడుదల చేసి ‘పిక్నిక్’ అనే టైటిల్‌ను ప్రకటించారు.

అవుట్ అండ్ అవుట్ ఫ్యామిలీ కామెడీ డ్రామాగా తెరకెక్కుతున్న ఈ చిత్రానికి గోవింద్ వసంత్ సంగీతం అందిస్తున్నారు. సందీప్ ప్రదీప్, ఇంద్రజిత్ సుకుమారన్, దిలీష్ పోతన్ కీలక పాత్రల్లో నటిస్తున్నారు. టైటిల్ పోస్టర్‌తో పాటు సినిమా విడుదల తేదీని కూడా మేకర్స్ ప్రకటించారు. ‘పిక్నిక్’ చిత్రం 2027 జనవరి 14న ప్రపంచవ్యాప్తంగా మలయాళం, తమిళం, తెలుగు, కన్నడ భాషల్లో థియేటర్లలో విడుదల కానుంది. విభిన్నమైన టైటిల్, ఫ్యామిలీ కామెడీ నేపథ్యంలో రూపొందుతున్న ఈ సినిమాపై ప్రేక్షకుల్లో ఆసక్తి మొదలైంది.